«Ես որեւէ մեկնաբանություն չեմ կարող տալ, քանի որ դատական քննություն է ընթանում»,-խորհրդարանում լրագրողների հետ զրույցում ասաց ՀՀ մարդու իրավունքների պաշտպան Արման Թաթոյանը` անդրադառնալով «Սասնա ծռեր» զինված խմբավորման գործողություններին:
Նա չի մեկնաբանում նաեւ զինված խմբավորման անդամների վերաբերյալ քաղաքական գործիչների այն հայտարարությունները, թե խմբավորման անդամների գործողություններում հանցակազմ կա: Հիշեցնենք, այդ մասին «Ազատություն» ռադիոկայանին տված հարցազրույցում խոսել էր նաեւ «Ելք» խմբակցության պատգամավոր Էդմոն Մարուքյանը:
Անդրադառնալով Ժիրայր Սեֆիլյանի եւ «Սասնա ծռերի» դատավարությունների ժամանակ փաստաբանների խուզարկությանն ու քաղաքացիների անձնագրային տվյալների հավաքագրմանը, Արման Թաթոյանն ասաց, որ խնդիրը գտնվում է իր ուշադրության կենտրոնում: Փաստաբանների նկատմամբ կատարված գործողություներն արձանագրված են ՄԻՊ աշխատակազմում, ՄԻՊ-ը գրություն է ուղարկել Դատական դեպարտամենտ` պարզաբանումներ պահանջելով այդ գործողությունների իրավական հիմքերի վերաբերյալ:
«Փաստաբանին իր անմիջական պարտականությունները կատարելիս խուզարկելը չի թույլատրվում: Դուք հիշում եք՝ քրեակատարողական հիմնարկների հետ կապված էլ խնդիր առաջացավ եւ մենք նույնպես այս հարցը բարձրացրել ենք եւ ես հստակ չափանիշներ էի դրել, թե ինչպես ենք մենք շարժվելու: Առաջինը, իհարկե, փաստաբանին խուզարկություն անելն արգելվում է: Երկրորդը, որ շատ կարեւոր նշանակություն ունի, փաստաբանը երբ մուտք է գործում այս կամ այն տարածք՝ դատարան կամ կոնկրետ ՔԿՀ, մուտք է գործում վստահորդին իրավաբանական օգնություն ցուցաբերելու նպատակով»,- ասաց Արմեն Թաթոյանը՝ նշելով, որ փաստաբանի մուտքի խոչընդոտումը նաեւ նրա վստահորդի վրա է անդրադառնում:
ՄԻՊ-ը Դատական դեպարտամենտին հարցում է արել նաեւ դատական նիստերին մասնակցող քաղաքացիների անձնագրային տվյալները հավաքագրելու վերաբերյալ: Գնահատականներ կտա, երբ պատասխանները ստանա:
Նելլի ԳՐԻԳՈՐՅԱՆ
