Հայաստանում էր ճանաչված
թատերական գործիչ Գիտիս Պադեգիմասը
Ժամանակին «Առավոտի» հետ զրույցում «Էպսիդոն» թատերախմբի հիմնադիրներից դերասան, ռեժիսոր, սցենարիստ Արմեն Սարգսյանը հայտնել էր, թե իր նպատակն է եղել «ունենալ երիտասարդական խումբ, չգնալ պետական թատրոն, լինել անկախ»: Թատերախումբն արդեն 5 տարեկան է եւ ընդլայնելով սեփական «անկախ» դաշտը, առաջին անգամ Հայաստան է հրավիրել լիտվացի ճանաչված թատերական գործիչ, Միխայիլ Չեխովի տեսության գիտակ Գիտիս Պադեգիմասին (լուսանկարում): Վերջինս վարպետության դասընթացներ է անցկացրել Երեւանի թատրոնի եւ կինոյի պետական ինստիտուտում:
«Առավոտի» հետ զրույցում Գիտիս Պադեգիմասը նշեց, որ իր առաջին այցն է մեր երկիր, նախաձեռնողներն էլ «Էպսիդոն» թատերախումբն ու նրա գեղարվեստական ղեկավար Արմեն Սարգսյանն է եւ ոլորտի որոշ երիտասարդներ: «Տաղանդավոր եւ ամենակարեւորը՝ նպատակասլաց երիտասարդ է Արմենը, որի հետ ծանոթացել եմ Մոսկվայի թատերական գործիչների միության կազմակերպած ամառային դպրոցում,- հայտնեց մեր զրուցակիցը, ապա հավելեց,- թեեւ Հայաստան առաջին այցս է, սակայն հիանալի գիտեմ ձեր մշակույթն ու արվեստագետներին, շատերի հետ մտերմությունը վերածվել է բարեկամության: Ընտանիքս ծանոթ էր Գուրգեն Մահարու հետ: Նրա կինը համերկրացիս էր: Լիտվացիների թարգմանությամբ քանիցս հրատարակվել են Մահարու գործերը. ո՞վ չի հիացել Գոհար Գասպարյանի, Զառա Դոլուխանովայի, Պավել Լիսիցյանի եւ մյուս երգիչների արվեստով: Ափսոսում եմ իմ բարեկամ Գեղամ Գրիգորյանի, որի տիկինը նույնպես համերկրացիս է, վաղաժամ մահվան կապակցությամբ, բայց մի փոքր էլ սփոփվում եմ, որ նրա դուստրը՝ Հասմիկը, մեծ կարիերա է անում արեւմտյան ճանաչված բեմերում: Էլ չեմ խոսում Փարաջանովի եւ ձեր գեղանկարիչների մասին: Ի վերջո, ԳԻՏԻՍ-ում ուսանելու տարիներին ինձ դասավանդել է թատերագետ, արվեստագիտության դոկտոր Գեորգ Գոյանը…»:
Տարբեր բեմերում ավելի քան 100 ներկայացում իրականացրած ռեժիսորից եւ տարբեր երկրներում, այդ թվում՝ Ռուսաստանում, չեխովյան ուսմունքի տարածողից հետաքրքրվեցինք այդ ուղղությամբ, քանի որ Միխայիլ Չեխովը 1920-ականներին արտաքսվել էր ԽՍՀՄ-ից, ապրել ու գործունեություն ծավալել ԱՄՆ-ում, հանգչում է Լաս Վեգասի գերեզմանատանը, իսկ Գիտիս Պադեգիմասը նրա ուսմունքի եզակի տարածողներից է:
Գիտիս Պադեգիմասի դասերը մեր թատերական ինստիտուտում:
«Չեխովյան ստեղծագործական մեթոդի առանցքում, բնականաբար, դերասանն է, որը հենց ինքն իրեն պետք է գտնի, բացահայտի եւ լիարժեք զարգացնի սեփական ստեղծագործական տաղանդը: Տպավորիչ լինելու համար նշեմ, որ սա յուրօրինակ իմպրովիզացիա է, այն էլ ջազային: Գիտեմ, որ հայերդ ջազի մեծ սիրահար եք: Ընդ որում, այս ուսմունքը վաղուց Արեւմուտքում հետաքրքրել է ոչ միայն թատրոնի մարդկանց:
Չեխովի մոտ են ուսանել այնպիսի դեմքեր, ինչպիսիք են Մերիլին Մոնրոն, Մարլոն Բրանդոն եւ այլք: Ավելին՝ այս ուսմունքը բոլոր նրանց համար է, ովքեր ցանկանում են սովորել, բացահայտել եւ լիարժեք զարգացնել իրենց ստեղծագործական տաղանդը որեւէ կոնկրետ գործունեությամբ: Ինձ մոտ դասընթացների են հաճախում տարբեր ոլորտի մարդիկ՝ բիզնեսմեններ, քաղաքական գործիչներ եւ այլն,- տեղեկացրեց մեր զրուցակիցը, ապա սահուն անցում կատարեց, գովեստի խոսքեր շռայլելով մեր թատերական ինստիտուտի ուսանողների հասցեին,- ոչ միայն ուսանողները, այլեւ ընդհանրապես հիացա ձեր երիտասարդներով: Գիտեն մեծին հարգել, այլ ոչ թե մեր երիտասարդների նման. բոլորը անխտիր աստղեր են, հաճախ նույնիսկ արհամարհում են մասնագետի, այդ թվում՝ մեծ արվեստագետի խոսքը, եւ այլն: Հիացած եմ Երեւանով: Ոչ մի քաղաքում չեմ տեսել այսքան արվեստագետների հուշարձաններ, եւ ոչ միայն արվեստագետների: Ամեն քայլափոխի հանդիպում եմ հայ մեծանուն գիտնականների, շինարարների, ճարտարապետների եւ այլ ոլորտների երախտավորների անունը հավերժացնող հուշատախտակների: Վերադառնալով Լիտվա՝ պետք է խնդրեմ, որ հայերի օրինակով մենք էլ կարողանանք հավերժացնել մեր մեծերին»:
Զրույցի ընթացքում Գիտիս Պադեգիմասը իր տպավորությունները ներկայացրեց Եղեռնի հուշարձանից ու Հայոց ցեղասպանության թանգարան ինստիտուտից:
Մեր զրուցակիցը մի փոքր էլ մենախոսեց, առանց մեկնաբանության էլ ասաց. «Մենք՝ լիտվացիներս, իսկապես սիրում ենք հայերիդ եւ շատ էինք ուզում, որ Ձեր երկիրն էլ դառնա Եվրամիության անդամ»:
ՍԱՄՎԵԼ ԴԱՆԻԵԼՅԱՆ
«Առավոտ»
13.06.2017
