Խորհրդարանում Արտաքին հարաբերությունների մշտական հանձնաժողովի կողմից՝ փորձագետներից բաղկացած «Անալիտիկ խորհուրդ» աշխատանքային խմբի ստեղծման գաղափարը ողջունում է նույն հանձնաժողովի փոխնախագահ Հերմինե Նաղդալյանը՝ համարելով այն բացառիկ նախաձեռնություն:
Մեզ հետ զրույցում նա մասնավորապես նշեց.
«Սա իսկապես ողջունելի գաղափար է, որովհետև այսօր խորհրդարանական դիվանագիտությունը ընդլայնվում է , «step by step» խորացնում է իր առնչությունները, ծավալները և, բնական է, մասնագիտական կարողությունների կիրառման լուրջ պահանջ կա: Խորհրդարանական դիվանագիտությունը ավելի ճկուն և ազատ է արտահայտման մեջ , բայց, այնուամենայնիվ, ունի խնդիրներ, որոնցից է՝ մասնագիտական, փորձագիտական կարողությունների ուժեղացման անհրաժեշտությունը, և այս իմաստով սա բացառիկ նախաձեռնություն է: Այսպիսի համապարփակ խորհրդատվական հարթակ երբևիցե չենք ունեցել, թեկուզև նախկինում եղել է բավականին լայն համագործակցություն՝ տարբեր ինստիտուտների, փորձագիտական շրջանակների հետ՝ ինչպես միջխորհրդարանական պատվիրակությունների հարթությունում, այնպես էլ ԱԺ արտաքին հարաբերությունների հանձնաժողովի աշխատանքների ձևաչափում, թեմատիկ տարբեր առնչությունների հետ կապված: Այսօր , այս խորհրդակցությանը ներկա են և համագործակցության ցանկություն են հայտնել փորձագիտական հանրույթի ավելի քան երեսուն կայացած և անվանի ներկայացուցիչներ, և ցանկանում եմ երախտագիտությունս հայտնել նրանց՝ արձագանքման համար:
Մեր հանրապետությունում այսօր նման կայացած ինստիտուտների խոսքը և՛ իրենց մասնագիտական և՛ հանրային ընկալման խորքային իմաստով բավականին ազդեցիկ է: Իհարկե, խորհրդարանական դիվանագիտության բարդությունների և նրբությունների մի շարք գոյություն ունի, որտեղ առկա են խնդիրներ, որոնք առնչվում են ազգային պետական և կուսակցական շահերի համադրմանը, անհատական և խմբային շահերին, իսկ պատվիրակությունները հիմնականում բազմակուսակցական են: Այստեղ կան նաև գործադիր և օրենսդիր իշխանությունների , արտաքին քաղաքականության պատասխանատվության խնդիրներ և այլն, բայց ամեն դեպքում շատ կարևոր է, որ մենք կարողանանք այս քննարկման հարթակը որպես «ուղեղային կենտրոն» կայացնել և հասնել սիներգիայի՝ խորհրդարանական դիվանագիտության իմաստով: Հավատում եմ, որ նախկինում ունեցած մեր համագործակցության փորձը՝ այսօր շատ ավելի ընդլայնված, համապարփակ կերպով արդյունքների է բերելու և բարձրացնելու է խորհրդարանական դիվանագիտության արդյունավետությունը:»
Մամուլի հաղորդագրություն
