Շենգավիթ վարչական շրջանի ընդհանուր իրավասության դատարանում ոստիկանների, կարգադրիչների ու Ժիրայր Սեֆիլյանի ու ընկերների գործով ներգրավված փաստաբանների միջեւ տարաձայնություններ կան: Ոստիկանները դատարանի շենքից ներս մտնող փաստաբանների անձը հաստատող վկայականներ են պահանջում, ըստ փաստաբանների, գրառում իրենց անձնական տվյալներն ու պահանջում բացել նրանց պայուսակները՝ զննության համար:
Փաստաբաններից մի քանիսը պնդում են, որ ոստիկանների արածը խուզարկություն է, ինչի իրավունքը նրանք չունեն:
«Ես հրաժարվում եմ, արգելում եմ բացել իմ պայուսակը, որեւէ մեկը չի կարող փաստաբանին զննել, դա բացառվում է»,- ասաց փաստաբան Նինա Կարապետյանցը:
Փաստաբան Տիգրան Հայրապետյանը նույնպես հրաժարվեց պայուսակը զննելու պահանջից. «Կասեք՝ ով է հրաման տվել, որ ցուցակագրեք փաստաբանների անձնական տվյալները: Սա ազգային անվտանգությո՞ւն եք ներկայացնելու, ո՞ւմ եք ներկայացնելու, դուք գիտեք՝ իրավունք չունեք, անձնական տվյալներ գրանցեք, սա քրեորեն պատժելի արարք է: Քրեորեն պատժելի արարք եք անում, թող ինչ-որ մեկը զանգի Հատուկ քննչական ծառայություն, ասի՝ հանցագործության դեպք է տեղի ունենում»:
Երբ փաստաբանները ահազանգեցին, որ ոստիկաններն ու կարգադրիչները խուզարկություն են իրականացնում դատարանում, կարգադրիչներից մեկը ճշտեց. «Հարգելի պաշտպան, ճիշտ ներկայացրեք լրագրողներին, մենք խուզարկություն չենք անում, արտաքին զննություն ենք իրականացնում»:
Փաստաբան Նինա Կարապետյանցն էլ ընդհատեց կարգադրիչին. «Խնդրում եմ ձեր տոնն իջեցրեք, այն ինչ դուք եք անում, կարող եք անվանել թիթեռ, փուչիկ, նապաստակ, բայց ձեր արածը խուզարկություն է»:
Խուզարկությունը բոյկոտած փաստաբանները հրաժարվում են նիստերի դահլիճ մտնել, դատական նիստը դեռ չի սկսվել:
Արփինե ՍԻՄՈՆՅԱՆ
