«Ցանկություն ունենք իմաստալից երկխոսություն ծավալել ՌԴ-ի հետ: Հուսով եմ՝ գալիք շաբաթում ՆԱՏՕ-ՌԴ խորհրդի հերթական ժողովը կկարողանանք գումարել եւ երկակի հետաքրքրություն ներկայացնող խնդիրներ քննարկել»,-այսօր Հայաստանում ՆԱՏՕ-ի Տեղեկատվական կենտրոնում լրագրողների հետ հանդիպմանն անդրադառնալով ՆԱՏՕ-Ռուսաստան հարաբերություններին, ասաց Հարավային Կովկասում եւ Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Ջեյմս Ապատուրայը:
Նա հայտնեց, որ ՆԱՏՕ-ն առաջիկայում մտադիր է Մերձբալթյան երկրներում լրացուցիչ զորամիավորումներ տեղակայել: «Դա տեղի է ունենում ի պատասխան ՌԴ ձեռնարկած գործողությունների: Մասնավորապես, Ղրիմի «կտրումը» եւ ներկայությունը Ուկրաինայում: Դա խոսում է այն մասին, որ ՌԴ-ն պատրաստ է զինված ուժերի օգնությանը դիմել՝ Եվրոպայում սահմաններ փոխելու նպատակով: Վրաստանում եւս անցանկալի ռուսական զինուժ է ներկա: Մենք ունակ ենք պաշտպանելու ՆԱՏՕ-ի բոլոր դաշնակիցներին»,-վստահեցրեց նա:
Ապատուրայի փոխանցմամբ՝ Մերձբալթյան երկրներում մոտ հազար հոգանոց զորախմբեր տեղակայելու մասին է խոսքը, ուստի ՌԴ-ի համար դա ռազմական սպառնալիք չէ. «Արեւմտյան ռազմական օկրուգում ՌԴ-ն ունի 300 հազարանոց զորք, այսինքն՝ գիշերվա քունը կորցնելու առիթ Ռուսաստանը չունի»:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
