«ՆԱՏՕ-ի բոլոր դաշնակիցները մտահոգ են սպառազինությունների ծավալի աճով, որի հետեւանքով քաղաքական լարումներն ու թշնամական գործողություններն են ավելանում»,-այսօր Հայաստանում ՆԱՏՕ-ի Տեղեկատվական կենտրոնում լրագրողների հետ հանդիպմանն անդրադառնալով Ռուսաստանի կողմից Ադրբեջանին զենք վաճառելու փաստին, ասաց Հարավային Կովկասում եւ Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Ջեյմս Ապատուրայը:
Նա փաստեց, որ ՆԱՏՕ-ի դաշնակիցներից երկուսը Մինսկի խմբի համանախագահներ են, իսկ Մինսկի խմբի հայտարարություններից պարզ է, որ համանախագահները նվիրված են խնդրի խաղաղ հանգուցալուծումը գտնելու գործընթացին:
«Մեզ համար ցանկալի է լարվածության նվազեցում եւ հարցի խաղաղ լուծում: ՆԱՏՕ-ն հետեւում է տարածաշրջանում անվտանգությանը: Մեր մտահոգության մակարդակն այսօր շատ ավելի բարձր է: Զինված բախումների մակարդակներն ավելի բարձր են եղել, ավելի ռազմատենչ հայտարարություններ են հնչել: Մեր դիրքորոշումն է՝ սատարել Մինսկի խմբի ջանքերին»,-վստահեցրեց նա:
Մանրամասն ՝ տեսանյութում:
Լուիզա ՍՈՒՔԻԱՍՅԱՆ
