Մերձավորարեւելյան ներկայիս ամենակարեւոր գործընթացը Իրաքյան Քրդստանում սեպտեմբերին սպասվելիք անկախության հանրաքվեն է: Այս մասին այսօր «Արմենպրես» գործակալությունում լրագրողների հետ հանդիպմանն ասաց թուրքագետ Ռուբեն Սաֆրաստյանը: «Թուրքիան երկընտրանքի առաջ է կանգնելու՝ թույլ տա՞լ այդ գործընթացը, թե խոչընդոտել, դրանից էլ կախված է լինելու այդ երկրի ապագան»,-նկատեց նա:
Փորձագետի բնորոշմամբ, թեեւ հայտարարվել է Իրաքյան Քրդստանի հանրաքվեի մասին, բայց այդ պետության հիմնումը կարող է տարիներ տեւել: Ընդ որում, հանրաքվեն սեպտեմբերին կարող է եւ տեղի չունենալ:
«Կարեւոր է, որ գործընթացը գնում է, եւ Մերձավոր Արեւելքում ապագայում կստեղծվի քրդական պետականություն, որը գրավելու է աշխարհի ուժային կենտրոնների ուշադրությունը: Այս ամենից մեզ համար կան վտանգներ եւ հնարավորություններ, քանի որ Մերձավոր Արեւելքում սահմաններ են փոխվելու: Մյուս կողմից, Սեւրի պայմանագիրը պետք է հիմք ծառայի նոր վերաձեւումների համար»,-նշեց Ռուբեն Սաֆրաստյանը:
Թուրքագետը կարծում է, որ Իրաքի քրդերի հանրաքվեն նախադեպ կլինի նաեւ Թուրքիայի քրդերի համար, իսկ թե ինչպես եւ երբ՝ ժամանակը ցույց կտա:
Մանրամասն՝ տեսանյութում
Լուիզա ՍՈՒՔԻԱՍՅԱՆ
