Այսօր «Երկիր Ծիրանի» կուսակցության ավագանիներին թույլ չտվեցին մտնել Երեւանի քաղաքապետարան, որտեղ պետք է տեղի ունենար Տարոն Մարգարյանի երդմնակալության արարողությունը:
Կուսակցության նախագահ Զարուհի Փոստանջյանը, սակայն, իր կուսակից ավագանիների հետ ոչ թե Տարոն Մարգարյանի երդման արարողությանն էր եկել մասնակցելու` այլ առանձին նիստ անելու:
Տիկին Փոստանջյանը նույնիսկ օրակարգ էր կազմել եւ պատրաստվում էր քննարկել ԱՄՆ 28-րդ նախագահ եւ Խաղաղության նոբելյան մրցանակի դափնեկիր Թոմաս Վուդրո Վիլսոնի արձանի տեղադրման նախաձեռնություն իրականացնելու վերաբերյալ հարցը: Երեւան քաղաքի տրանսպորտի աշխատանքին նույնպես պետք է անդրադառնար: Օրակարգում նաեւ ընդգրկել էր Երեւանի քաղաքապետարանի կոմունալ վարձերի վերաբերյալ,
Երեւանի վարչական շրջաններում քաղաքացիների հետ հանդիպումների եւ քննարկումների անցկացման աշխատանքների կազմակերպման վերաբերյալ հարցեր:
Զարուհի Փոստանջյանն ասաց, որ իրենք եկել են աշխատանքի, սակայն իրենց ներս չեն թողնում:
Տիկին Փոստանջյանն իր թիմակիցների հետ դրսում այնքան սպասեց` մինչեւ որ արարողությունը վերջացավ: Զարուհի Փոստանջյանի հետ քաղաքապետարանի դիմաց էին իրացման գոտու բնակիչները, որոնք բողոքի ցույց էին անում` պահանջելով փոխհատուցում: Արարողության ավարտից հետո քաղաքապետարանից դուրս եկող պաշտոնյաներին բնակիչներն ասում էին` «խաբեբաներ», «անամոթներ», «թալանչիներ»:
Լուսինե ԲՈՒԴԱՂՅԱՆ
