«Թուրքիայի մերձավորարեւելյան քաղաքականության նոր փուլը հիմնված է իր զինված ուժերը երկրի սահմաններից դուրս կիրառելու գործոնի վրա: Այս ամենը ռազմավարական առումով դեռեւս վտանգավոր չէ, բայց պետք է սպասել, որ Թուրքիան կշարունակի այդ քաղաքականությունը»,-«Արմենպրես» գործակալությունում այսօր լրագրողների հետ հանդիպմանն անդրադառնալով Թուրքիայի կողմից Կատարին ռազմական աջակցություն ցուցաբերելու եւ այդ երկրում զորախումբ տեղակայելու որոշմանը, ասաց թուրքագետ Ռուբեն Սաֆրաստյանը:
«Սա վտանգի մակարդակը Մերձավոր Արեւելքում ուժեղացնում է՝ այն դեպքում, երբ իրադրությունը գնալով սրվում եւ ավելի վտանգավոր է դառնում»,-նկատեց նա: Ապա ընդգծեց, որ այդ գործընթացին զուգահեռ՝ Ռուսաստանը հաջողությամբ ակտիվացնում է իր քաղաքականությունը Մերձավոր Արեւելքում:
«Այս տեսակետից ՀՀ-ի նշանակությունը նրա համար մեծանում է՝ կապված մեր աշխարհաքաղաքական դիրքի, Մերձավոր Արեւելքում հայկական համայնքների, ՀՀ-ում ռուսական ռազմակայանի հետ»,-համոզմունք հայտնեց Սաֆրաստյանը:
Բանախոսը չի սպասում, որ այդ ամենի համատեքստում՝ ՌԴ-ն Ադրբեջանի համար հնարավորություն կստեղծի ակտիվություն ցուցաբերել. «Ռուսաստանը կձգտի ստատուս քվոն տարածաշրջանում պահպանել»:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
