Տավուշի մարզի սննդի խանութներում «նիսյայի» հաստ տետրեր կան, որտեղ ապառիկ սնունդ գնածների անուններն են եւ նրանց կողմից վերցված սննդամթերքի գումարների մասին նշումներ: Կարիքավոր ընտանիքները ապառիկի պարտքը մարում են կենսաթոշակ, հաշմանդամության թոշակ եւ ընտանեկան նպաստ ստանալու օրը: Որոշ պարտքեր ամիսներով, նույնիսկ տարիներով չեն մարվում:
Սահմանամերձ Նոյեմբերյան քաղաքում սոցիալապես խիստ անապահով բնակիչներ կան, ովքեր նախորդ օրվա արտադրված, սակայն խանութներում չվաճառված հաց են գնում: Խանութներից տեղեկացանք, որ նախորդ օրը թխված, բայց չիրացված հացը հաջորդ օրն ավելի էժան է վաճառվում: Օրինակ, «Մատնաքաշ» տեսակի հացը, որը թխման օրը չի ծախվել, 220 դրամի փոխարեն հաջորդ օրը վաճառվում է 150 դրամով: Գների տարբերություն 70 դրամը խիստ կարիքավոր ընտանիքների համար գումար է:
Հավելենք, որ բնակչության արտագաղթի,մարդկանց գնողունակության անկման պատճառով Տավուշի մարզում հացի վաճառքի ծավալները նվազել են:
Ոսկան ՍԱՐԳՍՅԱՆ
