«Պետք չէ միամիտ լինել այդ աստիճան, որ կարծել իշխանությունները որոշել են երկրում կարգ ու կանոն հաստատել: Մեզնից ամեն մեկը կարող է 10-40 եւ ավել թվարկել, թե ինչի դեմ կարելի է պայքարել, որի դեմ չի պայքարվում»,- Aravot.am-ի հետ զրույցում այսպես ասաց իրավապաշտպան Սեյրան Մարտիրոսյանը օրերս Արտյոմ Կանեւսկու թիկնազորի վնասազերծման մասին՝ այսպիսով ոստիկանությունն ինչ ուղերձ է հղում հանրությանը:
Իրավապաշտպանի խոսքերով՝ եթե բոլոր շարասյունները պետք է նայվեն, ապա թող նայվեն բոլորը. «2 օր առաջ Ռուբեն Հայրապետյանի նույնչափ «էֆեկտիվ» ավտոշարասյունը գնում էր, բայց չգիտես ինչու, այդտեղ իշխանությունների ոչ մի միջամտություն չկար»:
Սեյրան Մարտիրոսյանը նշեց, որ սա ընդհանուր տրամաբանության մեջ է, որը ձեւավորվել է ավարտված ընտրություններից եւ սկսված դատավարություններից հետո. «Այսինքն` իշխանությունները ինչ-որ պլանավորել էին, արել են անաղմուկ ցանկալի արդյունքներով ապահովել են, հիմա էլ հարկավոր է վախի մթնոլորտը ավելի խտացնել: Իշխանությունները շատ բաներ են խոստացել եւ որոնք պետք է ինչ-որ ձեւով մարմնավորել գործողությունների մեջ: Այսինքն՝ հասարակության մոտ ոչ մի կերպ չընկալվող, չընդունվող բարքերի նկատմամբ մենք ունենք այս վերաբերմունքը»:
Անուշ ՄԱԹԵՎՈՍՅԱՆ
