Դավիթ Խաժակյան. «Ելքը» կաշկանդվածություն չունի «Երկիր Ծիրանիի» հետ համագործակցելու» (Տեսանյութ)

«Ելք» խմբակցության ղեկավարն ասում է՝ հանուն Երեւանի խնդիրների լուծման կարող են համագործակցել «Երկիր Ծիրանիի» հետ

Այսօր Երեւանի ավագանու նոր կազմով առաջին նիստն էր: Ինչպես արդեն տեղեկացրել էինք «Երկիր Ծիրանին» քաղաքապետարանի պատերից դուրս ավագանու նիստ արեց, այսինքն՝ բոյկոտեց նիստը:

Իսկ այդ ընթացքում քաղաքապետարանի նիստերի դահլիճում ավագանու անդամները 4 հանձնաժողովների նախագահներ եւ նախագահի տեղակալներ ընտրեցին:

Նշենք, որ Դոնթի բանաձեւով ավագանիում «Ելքին» մեկ հանձնաժողովի նախագահություն է հասնում: «Ելք»-ն առաջարկեց մշակույթի, կրթության եւ սոցիալական հարցերի մշտական հանձնաժողովի նախագահությունն իրենց տալ՝ Արայիկ Հարությունյանին էլ առաջարկեցին նախագահ:

ՀՀԿ-ն ձեռնպահ քվեարկեց Հարությունյանի թեկնածությանը, ինչպես որ «Ելքն» էլ ձեռնպահ քվեարկեց ՀՀԿ-ի մյուս 3 հանձնաժողովների հանրապետական թեկնածուներին: Այնուամենայնիվ, Արայիկ Հարությունյանն ընտրվեց այդ հանձնաժողովի նախագահ, իսկ տեղակալ՝ ՀՀԿ խմբակցության անդամ Ռուզաննա Սիրունյանը:

Մանրամասն՝ տեսանյութում

Մյուս 3 հանձնաժողովների նախագահները ՀՀԿ-ից ընտրվեցին: Երբ ՀՀԿ-ն ներկայացնում էր իրենց թեկնածուների կենսագրությունը, «Ելքից» Անահիտ Բախշյանը զարմացավ եւ դժգոհություն արտահայտեց՝ «Մերոնց կենսագրությունն ինչո՞ւ չկա, Արայիկի կենսագրությունն ինչի չկա»:

Բախշյանի զարմանքը ՀՀԿ խմբակցության որոշ անդամների մոտ ծիծաղ առաջացրեց: Պարզվեց՝ իրենց թեկնածուների կենսագրությունը ներկայացնելը պարզապես ՀՀԿ-ի նախաձեռնությունն է, եւ այն պարտադիր պայման չէ, կանոնակարգով նման բան սահմանված չէ:

Մանրամասն՝ տեսանյութում

Ավագանու նիստից հետո «Ելք» խմբակցության ղեկավար Դավիթ Խաժակյանից լրագրողները հետաքրքրվեցին՝ թե ի՞նչ կարծիք ունի «Երկիր Ծիրանիի»՝ նիստը բոյկոտելու նախաձեռնության մասին, արդյոք հնարավո՞ր է «Ելքը» համագործակցի «Երկիր Ծիրանիի» հետ: Այս հարցերին ի պատասխան Խաժակյանն ասաց. ««Ելք» խմբակցությունը որոշել է ակտիվ պայքարել հնարավոր բոլոր հարթակներում Երեւանի խնդիրները լուծելու համար: Որեւէ այլ խմբակցության գործունեություն ես մեկնաբանելու նպատակ չեմ տեսնում: Մենք որեւէ կաշկանդվածություն չունենք քաղաքային խնդիրները լուծելու նպատակով համագործակցել «Երկիր Ծիրանիի» հետ:

Մանրամասն՝   տեսանյութում

Նելլի ԲԱԲԱՅԱՆ