ԵԱՀԿ Ժողովրդավարական հաստատությունների և մարդու իրավունքների գրասենյակի (ԺՀՄԻԳ) ղեկավար Մայքլ Գեորգ Լինքը մտահոգություն է հայտնել Ադրբեջանում լրագրող Աֆգան Մուխթարլիի ձերբակալության և մեկուսարանում նրա հետ վատ վերաբերմունքի կապակցությամբ: Այս մասին ասվում է ԵԱՀԿ/ԺՀՄԻԳ տարածած հաղորդագրության մեջ:
«Աֆգան Մուխթարլիի նկատմամբ վատ վերաբերմունքի մասին պնդումները և նրան Ադրբեջան վերադարձնելու հանգամանքները պետք է մանրամասն քննության ենթարկվեն՝ պարզելու համար գործով փաստերը, որոնք պետք է պատշաճ դատական քննության ենթարկվեն,- ասել է նա՝ հավելելով, որ իշխանության չարաշահման ցանկացած դեպք պետք է ուսումնասիրվի, իսկ մեղավորները՝ պատասխանատվության ենթարկվեն:
«ԺՀՄԻԳ-ը կշարունակի հետևել այս բացառիկ դեպքին,- ասել է Լինքը:- Եթե պարզվի, որ Աֆգան Մուխթարլիի դեմ քրեական մեղադրանքները անհիմն են կամ վկայությունները կորզվել են ճնշումների միջոցով, իշխանությունները պետք է անհապաղ հանեն նրա վրայից մեղադրանքները և ազատ արձակեն նրան»:
Հիշեցնենք, ադրբեջանցի ընդդիմադիր լրագրող Աֆգան Մուխթարլին առևանգվել էր Վրաստանում և տեղափոխվել Ադրբեջան, որտեղ էլ ձերբակալվել էր:
Պատրաստեց՝ Վիկտորյա ԱՆԴՐԵԱՍՅԱՆԸ
