Այսօր կառավարության առաջ ցուցարարների մի քանի խումբ կար` Ֆիրդուսի տարածքի առեւտրականները, «Նաիրիտի» նախկին աշխատակիցները, հաշմանդամ դարձած օդաչուները:
«Ոչ մի տեղ էլ դուրս չենք գալու, թող փորձեն մեզ հանեն»,-Aravot.am-ի հետ զրույցում ասաց Ֆիրդուսում առեւտուր անող կանանցից մեկը: Նրա խոսքով. «Վարկեր ենք վերցրել, ապրանք ենք բերել եւ հիմի պետք է առեւտուր անենք` մեզ հանում են, ուրիշ տեղ ուղարկում, բայց մեր գնորդները ուրիշ տեղ չեն գալու մեզ գտնեն»:
Նրանց տաղավարների տարածքում շինարարական աշխատանքներ են իրականացվելու, շենքեր են կառուցվելու:
Ինչպես մեզ հետ զրույցում նշեցին առեւտրականները, քաղաքապետը հանձնարարել է իրենց այլ շուկաներում տեղավորել, սակայն առեւտրականները գտնում են, որ այլ տոնավաճառ գնալով գնորդներին կկորցնեն: Նրանք ասացին, որ չեն պատրաստվում իրենց տարածքները լքել` չնայած այն բանին, որ քաղաքապետարանը մեկ շաբաթ ժամանակ է տվել գույքագրում անելու եւ տեղափոխվելու:
Կառավարության մոտից Ֆիրդուսի առեւտրականները գնացին քաղաքապետարան:
Լուսինե ԲՈՒԴԱՂՅԱՆ