«Տեղի է ունենում լուրջ քաղաքական սխալ: Հարված է հասցվում ՀՀ-ին: 21 տարի առաջ տեղական ինքնակառավարման համակարգը ամբողջությամբ վերաձուլման է ենթարկվում»,- այսօր ԱԺ-ում հայտարարեց «Ծառուկյան» դաշինքի պատգամավոր Արարատ Զուրաբյանը՝ համայնքների խոշորացման մասին խոսելով:
Հիշեցնենք, որ ԱԺ-ում քննարկվում է «Վարչատարածքային բաժանման մասին» օրենքում փոփոխություններ եւ լրացումներ կատարելու մասին նախագիծը: Նախագծով առաջարկվում է համայնքների խոշորացման գործընթացը շարունակել:
Արարատ Զուրաբյանը հարցրեց Վաչե Տերտերյանին՝ պարոն Տերտերյան, Չարենցավան եւ Հրազդան քաղաքներն էլ ավելի լավ չի՞ լինի միացնենք իրար, երբ որ այդ երկու քաղաքներն էլ շատ վատ են գոյատեւում, ասենք: Այս տրամաբանությունը քաղաքական լուրջ սխալի մասին է խոսում. «Մեզ մոտ կայացավ տեղական ինքնակառավարումը, բայց չկայացրեցինք ռեգիոնալ կառավարումը: Դրա բացերը փորձում ենք համայնքների փնջերով փոխարինել»:
Արարատ Զուրաբյանն առաջարկում է վերացնել պետական կառավարման անհիմն մարմինները՝ մարզպետարանները, վերականգնել շրջանները. «Շրջանները թող ստանան ռեգիոնալ ինքնակառավարման մարմնի կարգավիճակ եւ բոլոր գործընթացները, երբ հնարավոր է ընդհանրական որոշում կայացնել, գնալ այս ճանապարհով»:
Զուրաբյանը անհեթեթություն որակեց համայնքների խոշորացումը եւ հորդորեց դադարեցնել այդ գործընթացը:
Հռիփսիմե ՋԵԲԵՋՅԱՆ
