Aravot.am-ը տեղեկացրել էր, որ այսօր առավոտյան Վարդենիս-Մարտակերտ ավտոճանապարհը փակել էին Գեղարքունիքի մարզի մի քանի համայնքի բնակիչներ: Նրանք բողոքի ակցիա էին անում եւ կառավարությունից պահանջում՝ վերանայել համայնքների խոշորացման ծրագիրը: Նրանք դժգոհում են, որ իրենց մարզի մոտ 20 համայնքներ պետք միավորվեն եւ խոշորացման արդյունքում ընդամենը 2-3 համայնք լինի:
Ցույցի մասնակիցներն այսօր հանդիպել են վարչապետ Կարեն Կարապետյանի հետ եւ իրենց դժգոհությունը ներկայացրել:
Aravot.am-ի հետ զրույցում ցուցարարներից մեկն ասաց, որ վարչապետի հետ հանդիպումը անարդյունավետ էր. կառավարության ղեկավարը նրանց պահանջներին ընդառաջ չի գնացել: Այսինքն՝ այդ համայնքների խոշորացման ծրագիրը շարունակվելու է:
Մինչ այս հանդիպումը, ցուցարարները սպառնում էին՝ եթե իրենց պահանջը չկատարվի, ապա ցույցերը շարունակելու են, եւ նրանք պատրաստվում են նույնիսկ երկաթգիծը «շրջափակման» մեջ առնել:
Թե վաղն ինչ կանեն՝ կշարունակեն ցույցերը, կփակե՞ն գնացքի ճանապարհն ու Վարդենիս-Մարտակերտ ավտոճանապարհը, մեր զրուցակիցները դժվարացան ասել: Նշեցին՝ «Այս պահին կոնկրետ որոշում չունենք հետագա քայլերի մասին: Բայց մենք հանձնվողը չենք»:
Նելլի ԲԱԲԱՅԱՆ
