«Ավտովարորդների պաշտպանության լիգայի» նախագահ Տիգրան Հովհաննիսյանն այսօր «Նոյյան տապան» լրատվական գործակալությունում հայտարարեց, որ մտադիր են իրենց խնդիրն իրավական դաշտ տեղափոխել: Հիշեցնենք, որ ամիսներ առաջ տաքսիստները հավաքվում էին կառավարության շենքի դիմաց եւ խնդրում վարորդների լիցենզավորման համար կուտակված գումարները զրոյացնել:
Ըստ Հովհաննիսյանի՝ խնդիրը հետեւյալն է. «Օնլայն տաքսի-ծառայություններն ապօրինի կերպով այնպես արեցին, որ օրվա հացը վաստակող վարորդները չկարողացան այդ գումարները վճարել: 12000 դրամը մեծ բեռ դարձավ նրանց համար»:
Վարորդները հանդիպել են Տրանսպորտի, կապի եւ տեղեկատվական տեխնոլոգիաների նախարարի հետ, սակայն երկխոսությունն անարդյունք է եղել, ինչից հետո պահանջել են, որ մոտ հինգ հազար տաքսիստների համար համաներում կիրառեն: «Մոտ 300 միլիոն դրամի մասին է խոսքը»,-նշեց Տիգրան Հովհաննիսյանը:
«Մեկ ամիս է՝ նախարարից պատասխան չկա: Արդեն երեք վարորդի դատի են տվել, հարկադիրն է գալիս…նախարարը խոստացել է, որ հարցը կբարձրացնի նախագահի եւ վարչապետի մոտ: Եթե չի կարող դա անել, թող այդպես էլ ասի, մենք էլ դատի տանք իրեն»,-հայտարարեց նա:
Բանախոսը նաեւ տեղեկացրեց, որ լիցենզավորման վճարը չմուծած վարորդներին հիսուն հազարով տուգանել են:
Լուիզա ՍՈՒՔԻԱՍՅԱՆ
Լուսանկարը՝ «Նոյյան տապան»-ի
