Միջազգային ճգնաժամային խմբի փորձագետ Օլեսյա Վարդանյանն այսօր «Մեդիա կենտրոնում» տեսակապի միջոցով լրագրողների հետ զրույցում անդրադարձավ կառույցի՝ օրերս հրապարակած զեկույցին, համաձայն որի՝ Արցախի եւ Ադրբեջանի միջեւ պատերազմի բռնկման վտանգը բարձր է: «Կողմերը հասկանում են, որ պատերազմը հավասարազոր է ինքնասպանության»,-ասաց Օլեսյա Վարդանյանը:
Նա արձանագրել է, որ արցախա-ադրբեջանական շփման գծում բացակայում են միջադեպերը եւ էսկալացիան բացառող-վերահսկող մեխանիզմները. «Մոնիթորինգի մեխանիզմների ներդրումը շատ կարեւոր է, այլապես տեղային սրացումները կարող են ավելի մեծ ծավալներ ընդգրկել»:
Փորձագետի խոսքով՝ ամենամեծ վտանգը կողմերի միջեւ շփումների բացակայությունն է. «Կարծես երկու ատրճանակներ միմյանց ուղղված լինեն, մենք էլ սպասում ենք, թե ով կսկսի»:
Քաղաքագետ Ստեփան Սաֆարյանը նկատեց՝ զեկույցից պարզ է, որ Ադրբեջանը պատերազմի է պատրաստվում. «Բայց դա նորություն չէ: Կարծում եմ՝ կողմերի միջեւ շփումներ կան, բայց դրանք միջնորդավորված են ՌԴ-ի կողմից»:
Քաղաքագետ Ալեքսանդր Իսկանդարյանն էլ հավելեց, որ հակամարտության սրացման վտանգ կա եւ այն ավելանում է. «Սրացումն ու պատերազմը տարբեր են: Եթե կան նախադրյալներ, որպեսզի սրացումը վերածվի պատերազմի, պետք է ցույց տալ դրանք: Որոշ հակամարտությունների դեպքում տասնամյակներով սրացումներ են լինում, բայց ոչ՝ պատերազմ: Եթե պատերազմի հավանականությունը մեծ է, ինչո՞ւ այն ապրիլին տեղի չունեցավ: Տարբերեք սրացումը պատերազմից»:
Լուիզա ՍՈՒՔԻԱՍՅԱՆ
Լուսանկարը՝ «Մեդիա կենտրոնի»
