Ուկրաինայում կազմակերպված 18-օրյա ուսումնամարզական հավաքից հետո Հայաստանի մեծահասակների, երիտասարդների եւ պատանիների հավաքականները վերադարձել են եւ մարզումները շարունակում են Աբովյանում:
Հայաստանի ծանրամարտի ֆեդերացիայի գլխավոր քարտուղար եւ տղամարդկանց ազգային հավաքականի գլխավոր մարզիչ Փաշիկ Ալավերդյանը գոհ է արտագնա հավաքի արդյունավետությունից եւ նշում է, որ դրա արդյունքներն արդեն հիմա շոշափելի են: Նրա խոսքերով, մեծահասակների, երիտասարդների եւ պատանիների մարզիչները զբաղված են այս տարվա գլխավոր մեկնարկներին արժանապատիվ մասնակցելու խնդիրներով:
Հունիսի 15-ին Տոկիոյում մեկնարկում է աշխարհի երիտասարդական առաջնությունը, օգոստոսին՝ Համաշխարհային ուսանողական խաղերը (Թաիլանդ, Տայպեյ), սեպտեմբերին՝ Եվրոպայի պատանիների առաջնությունը (Կոսովո, Պրիշտինա), հոկտեմբերին՝ 20 եւ 23 տարեկանների աշխարհի առաջնությունը (Ալբանիա, Տիրանա), նոյեմբեր-դեկտեմբերին՝ մեծահասակների աշխարհի առաջնությունը (ԱՄՆ, Անահայմ):
Արդեն հայտնի են այն ծանրորդների անունները, որոնք մասնակցելու են առաջիկա երկու մեկնարկներին: Աշխարհի երիտասարդական առաջնություն մեկնելու են 75 կգ քաշային Սոնա Պողոսյանը, +75 կգ՝ Արփինե Դալալյանը, 85 կգ քաշայիններ Հակոբ Մկրտչյանն ու Դավիթ Հովհաննիսյանը, 105 կգ՝ Սամվել Գասպարյանը եւ +105 կգ՝ Սիմոն Մարտիրոսյանը:
Համաշխարհային ուսանողական խաղեր ամենայն հավանականությամբ կմեկնի երեք տղա՝ Անդրանիկ Կարապետյանը, Սիմոն Մարտիրոսյանը եւ Գոռ Մինասյանը: Փաշիկ Ալավերդյանն ասում է, որ ցանկալի է, որպեսզի ունիվերսիադայում հանդես գան միայն այն ծանրորդները, որոնք կարող են պայքարել մեդալների համար:
Աշոտ ՀԱԿՈԲՅԱՆ
