Հունիսի 6-ին «Փարավոն» ժամանցի համալիրում ավարտվեց «ՄԻՍՍ ԱՊՀ» միջազգային գեղեցկության մրցույթի եզրափակիչը, որի հաղթողը դարձավ մոդել, սերիալների դերասանուհի Շուշան Երիցյանը:
Հայաստանից մրցույթին մասնակցում էր 3 գեղեցկուհի:
Մասնակիցները մրցույթի ընթացքում ներկայացան առօրյա կերպարով, լողազգեստներով, ազգային տարազներով եւ երեկոյան զգեստերով, ինչպես նաեւ ցուցադրեցին իրենց մոդելային կարողությունները՝ ներկայացնելով հայկական բրենդներից մեկի հավաքածուն:
Ի թիվս Ռուսաստանից ժամանած այլ երգիչ-երգչուհիների, միջոցառմանը հանդես եկան երգիչ, կոմպոզիտոր Միշել Դարը, «Իքսֆակտոր» շոուի մասնակից Ալիսա Դանելիան, Յուլիա Սամոյլովան, որը 2018 թ.-ին կներկայացնի Ռուսաստանը «Եվրատեսիլ» երգի մրցույթում, ռուսական «Գոլոս» նախագծի եւ «Նոր ալիք 2012» մրցույթի մասնակից Մայքլ Բլեյզը, որը համաշխարհային հայտնի հիթերից բացի, կատարեց նաեւ Առնո Բաբաջանյանի Նոկտյուրնը:
«Միսս ԱՊՀ 2017» մրցույթի եզրափակչին մասնակցելու համար Հայաստան են ժամանել ԱՊՀ անդամ երկրների 17-27 տարեկան 25 գեղեցկուհիներ, որոնք իրենց երկրներում ճանաչվել են գեղեցկության մրցույթի հաղթող:
Ազա ՍԱՐԳՍՅԱՆ
