«Երիտասարդության` 18-25 տարեկանների գործազրկությունն անչափ բարձր է` 37 %, արտաքին պարտքի հարաբերակցությունը ՀՆԱ-ի նկատմամբ, արդեն շատ բարձր է, արտաքին պարտքի սպասարկման ծախսերը եւս շատ բարձր են: Օտարերկրյա ուղղակի ներդրումների հոսքը նույնպես շատ ցածր է»,-այսպիսի մտահոգություն հայտնեց Հետազոտական ռեսուրսների կովկասյան կեն տրոնի Հայաստան հիմնադրամի գործադիր տնօրեն Հեղինե Մանասյանը:
Հեղինե Մանասյանի մեկնաբանությունը` տեսանյութում
Այսօր տիկին Մանասյանը եւ այլ փորձագետներ ՄԱԿ-ի հայաստանյան գրասենյակում ներկայացրին Մարդկային զարգացման զեկույցի արդյունքները: 2015 թվականին Հայաստանի մարդկային զարգացման համաթվի (ՄԶՀ) արժեքը` 0.743 է եղել, ինչը մեր երկիրը դասակարգել է մարդկային զարգացման բարձր սանդղակում` 188 երկրների եւ տարածքների թվում զբաղեցնելով 84-րդ տեղը: 1990 թվականից մինչեւ 2015 թ.-ն այդ ցուցանիշն աճել է 17.2 տոկոսով, կյանքի սպասվող տեւողությունն ավելացել 7.0 տարով, իսկ կրթության ակնկալվող տեւողությունը` 2.0 տարով, մինչդեռ մեկ շնչի հաշվով համախառն ազգային արդյունքը գրանցել է 122.0 տոկոս աճ:
Ըստ մասնագետների, Հայաստանի ՄԶՀ արժեքը ցածր է մարդկային զարգացման բարձր համաթիվ ունեցող երկրների միջին 0.746 ցուցանիշից, ինչպես նաեւ Եվրոպայի եւ Կենտրոնական Ասիայի երկրների միջին 0.756 ցուցանիշից: Իրանի ՄԶՀ-ն 69 է, Վրաստանինը` 70, Ադրբեջանի ՄԶՀ-ն 78 է, ՌԴ-ինը` 49:
Aravot.am-ը միջոցառմանը ներկա աշխատանքի եւ սոցիալական հարցերի նախարար Արտեմ Ասատրյանից հետաքրքրվեց, թե ի՞նչ ենք անելու, որ ՀՀ նախագահ Սերժ Սարգսյանի նշած` 4 միլիոն բնակչությանը հասնենք 2040 թվականին: Հարցրինք նաեւ, թե արտագաղթի այս տեմպերով արդյոք հնարավո՞ր է բնակչության ավելացում:
Ըստ նախարարի, ժողովրդագրական ազգային ծրագրի հիմքում նախատեսվում է ստեղծել այն հիմնական նախադրյալները, որոնց շնորհիվ ներգաղթ ենք ունենալու:
Մեր այն դիտարկմանը, թե ժողովրդագիրները կանխատեսում են, որ 2025 թվականին մահերի թիվը գերազանցելու է ծնունդների թվին, պարոն նախարարն ասաց, որ առաջիկա տարիներին նվազելու է վերարտադրողական տարիքի կանանց թվաքանակը, պայմանավորված` 2000-ականներին ծնված անձանց թվաքանակի նվազմամբ:
Լուսինե ԲՈՒԴԱՂՅԱՆ
