2017 թվականի հունիսի 5-ին www.aravot.am կայքի կողմից տեղեկություն է հրապարակվել, որ քրեակատարողական հիմնարկներում ազատությունից զրկված անձանց չեն թույլատրում հեռախոսակապ հաստատել Մարդու իրավունքների պաշտպանի աշխատակազմի թեժ գծին:
Այդպիսի ցանկացած փորձ օրենքի կոպիտ խախտում է և զրկում է ցանկացած անձի, այդ թվում՝ կալանավորվածին կամ դատապարտյալին Պաշտպանին դիմելու սահմանադրական իրավունքից:
Ազատությունից զրկման վայրում գտնվող անձի հետ Պաշտպանի կամ նրա ներկայացուցչի անարգել և խորհրդապահական կարգով հաղորդակցվելու հնարավորությունը երաշխավորված է «Մարդու իրավունքների պաշտպանի մասին» ՀՀ սահմանադրական օրենքով: Ընդ որում, այն ապահովելու պարտականություն կրում են բոլոր պետական և տեղական ինքնակառավարման մարմիններն ու դրանց պաշտոնատար անձինք:
Անձն անհատականացնող տվյալների ներկայացման դեպքում ՀՀ մարդու իրավունքների պաշտպանի կողմից կսկսվի հարցի քննարկման ընթացակարգ՝ վերը նշված հրապարակման հանգամանքները պարզելու համար:
ՀՀ Մարդու իրավունքների պաշտպանի աշխատակազմ
