Հունիսի 5-ին մշակույթի նախարարությունում կայացավ «Ոսկե ծիրան» միջազգային 14-րդ կինոփառատոնի մեկնարկին նվիրված ասուլիս, որին մասնակցում էին նախարար Արմեն Ամիրյանը, «ՎիվաՍել-ՄՏՍ» ընկերության գլխավոր տնօրեն Ռալֆ Յիրիկյանը, «Ոսկե ծիրանի» հիմնադիր տնօրեն Հարություն Խաչատրյանը, փառատոնի ծրագրերի տնօրեն Միքայել Ստամբոլցյանը եւ գեղարվեստական տնօրեն Սուսաննա Հարությունյանը:
Փառատոնն այս տարի կկայանա հուլիսի 9-16-ը:
Մշակույթի նախարար Արմեն Ամիրյանի ձեւակերպմամբ, ամեն տարի «Ոսկե ծիրան» կինոփառատոնն ուրախություն է բերում մեր քաղաքին: «Այս փառատոնը կինոյի զարգացման մեր պատկերացրած հայեցակարգում լրջագույն դերակատարություն ունի եւ հարթակ է նաեւ գործարար ծրագրերի փոխանակվելու»,- նշեց նախարարը:
Պարոն Յիրիկյանի խոսքով, փառատոնը մեր երկրի կարեւորագույն միջոցառումներից է, նաեւ «Ոսկե ծիրանով» է մեր երկիրը արժեւորվում աշխարհում, ու փառատոնն այս իմաստով արդարացնում է իր առաքելությունը: «Ամեն տարի ամռանը «Ոսկե ծիրանի» օրերին Երեւանն իսկական տոն է ունենում: Այն արժեհամակարգ ձեւավորող, արվեստի լեզվով խնդիրները վեր հանող, գեղեցիկն ու առողջը սերմանող երեւույթ է, որը արդեն 14 տարի այցեքարտ է դարձել Հայաստանի համար»,- հավելեց ՎիվաՍԵլ-ՄՏՍ-ի գլխավոր տնօրենը:
Հարություն Խաչատրյանը թվարկեց բոլոր աջակիցներին ու շեշտեց հատկապես ՀՀ նախագահի առանձնահատուկ վերաբերմունքը փառատոնի հանդեպ: «Ոսկե ծիրանը» անձնական բան չէ: Շատ երկրներ իրենց լավագույն ուղերձներում մեր երկիրը հիշելիս վկայակոչում են «Ոսկե ծիրանը»,-փաստեց փառատոնի հիմնադիր տնօրենը:
Միքայել Ստամբոլցյանը տեղեկացրեց, որ փառատոնը ստացել էր 1100 հայտ` 96 երկրից, իսկ մրցութային եւ արտամրցութային տարբեր ծրագրերում ընդգրկվել է ավելի քան 100 ֆիլմ: Երեւան են «գալու» Կաննի կինոփառատոնի 8 ֆիլմերը, Ռոտերդամի փառատոնի 3 ֆիլմերը, Վենետիկի եւ մյուս փառատոների լավագույն ֆիլմերը:
Այս տարի «Ոսկե ծիրանը» էլեկտրոնային հարցում էր իրականացրել, թե հանդիսատեսն ինչ ֆիլմեր կցանկանա դիտել եւ փառատոնի ծրագրում հաշվի են առնվել կինոսիրողների նախասիրությունները:
Փառատոնի միջազգային խաղարկային ժյուրիի կազմում են ռեժիսորներ Հյու Հադսոնը, Սիռո Գեռան, Ալեքսեյ Ֆեդորչենկոն, Իլդիկո Էնյեդին: Վավերագրական մրցույթի ժյուրին ներկայանում է հետեւյալ կազմով` Յուջին Քոր, Թոմ Ֆասարթ, Միքելանջելո Մեսսինա, Գրիգոր Հարությունյան եւ Միմի Գյորգովսկա: «Հայկական համայնապատկեր» ազգային մրցույթում Մարիամ դ՛Աբոն է, Դավիթ Սաֆարյանը, Յադվիգա Նովակովսկան, Գագա Չխեիձեն եւ Յան Գերգերը:
«Ոսկե ծիրանի» գեղարվեստական տնօրեն Սուսաննա Հարությունյանը նշեց, որ փառատոնը կբացվի Համո Բեկնազարյանի «Խասփուշ» ֆիլմով, որի 90-ամյակն է լրանում այս տարի: Սա հայկական առաջին պատմահեղափոխական կինոնկարն է: Ֆիլմը կցուցադրվի Վահագն Հայրապետյանի եւ բենդի` հատուկ ֆիլմի համար գրված երաժշտության ուղեկցությամբ:
Այս տարի կբացվեն նաեւ 3 երեւելիների աստղերը Շառլ Ազնավուրի հրապարակում՚ Միքայել Դովլաթյան, Սերգեյ Իսրայելյան, Յուրի Երզնկյան:
Ֆիլմերը, բացի հիմնական կինոթատրոններից, բացօթյա կցուցադրվեն 7 հրապարակներում եւս:
«Ոսկե ծիրանը» կփակվի Ջո Բեռլինգերի «Բնաջնջման մտադրություն» (2017թ.) ֆիլմով, որի պրեմիերան տեղի է ունեցել «Տրայբեկա» կինոփառատոնում: Ռեժիսորը ներկա կլինի ցուցադրությանը, նաեւ վարպետության դաս կանցկացնի:
Հարություն Խաչատրյանը շեշտեց, որ այս տարի «Ոսկե ծիրանը» կինոաշխարհի առնվազն 10 հսկայի ֆիլմեր է ներկայացնելու, իսկ այլ մանրամասներ առայժմ չհայտնեց. «Չի կարելի մեկ զամբյուղի մեջ դնել ամբողջ տեղեկատվությունը, դեռ ասուլիսներ կունենանք, կհանդիպենք ու կտեղեկանանք, թե ինչ հատուկ հյուրեր կունենանք»
Գոհար ՀԱԿՈԲՅԱՆ
