Հունիսի 4-ին «Միսս ԱՊՀ – 2017» միջազգային գեղեցկության մրցույթի մասնակիցներն ու կազմակերպիչները փոքրիկ հայուհու՝ Էլեն Ասոյանի հրավերով այցելեցին Հայոց ցեղասպանության զոհերի հուշահամալիր:
18-25 տարեկան գեղեցկուհիներին Եղեռնի հուշահամալիր ուղեկցեց «Գեղեցկության և նորաձևության միջազգային լիգայի պատվավոր անդամ» 6-ամյա Էլենը, որն արդեն 3 անգամ դարձել է «Միսս Տիեզերք», ճանաչվել ՝«Աշխարհի Թոփ-Մոդել» և բերել է Հայաստան բազում հաղթանակներ:
Մոդելներն արդեն հասցրել էին ճանաչել փոքրիկ գեղեցկուհուն, որն առաջին օրվանից հյուրերին ներկայացրեց հայ ժողովրդի ամենաողբերգական պատմության հուշահամալիրը: Ցուցադրելով իր մասնակցությամբ Ծիծեռնակաբերդի մասին տեսանյութը՝ Ասոյան Էլենը կոչ արեց միանալ իրեն հանուն աշխարհի խաղաղության: ԱՊՀ երկրների ներկայացուցիչները մեծ սիրով համաձայնվեցին հարգանքի տուրք մատուցել Հայոց ցեղասպանության զոհերի հիշատակին:
Սպասվում է նոր տեսանյութ, այս անգամ 25 միջազգային կարգի մոդելների և հայրենասեր հայուհու ՝ Էլեն Ասոյանի մասնակցությամբ:
Ի դեպ, նախորդ տեսանյութը 6-ամյա գեղեցկուհին Հայոց ցեղասպանության 100-ամյակին նվիրված հիշատակին ՝ 2015 թվականին ցուցադրեց Թուրքիայում միջազգային մրցույթի ժամանակ: Այդ տարի Էլենը կրկին հաղթանակը բերեց հայրենիք:
Մրցույթի ողջ ընթացքում այս փոքրիկ աղջիկը կազմակերպեց բազում միջոցառումներ հյուրերի համար, անցկացրեց հարցազրույցներ մոդելների հետ և ծանոթացրեց բոլորին հայ ազգի կենսակերպի առանձնահատկությունների հետ:
«Միսս ԱՊՀ» միջազգային գեղեցկության մրցույթը առաջին անգամ է անցնում Հայաստանում: Սա նոր մասշտաբային ծրագիր է, որը կազմակերպել են երեք բրենդային կազմակերպություններ՝ «Թոփ մոդել Ռոսսիի» և «Ռոսսիյսկայա կրասավիցա» համառուսական մրցույթների կազմակերպիչ «Ալեքս Գրուպ» ՍՊԸ պրոդյուսերական կենտրոնը (Մոսկվա), «Նաիրի թրավել» տուրիստական գործակալությունը (Երևան) և «Կրեատոր Անապա Փարիզ» պրոդյուսերական կենտրոնը:
Հունիսի 6 –ին Երևանի «Փարավոն» ժամանցի համալիրում կկայանա միջազգային գեղեցկության մրցույթի եզրափակիչը:
Մամուլի հաղորդագրություն
