«Մեզ համար կարեւոր էր ոչ թե հաղթանակը, այլ ճիշտ խաղալը, որն արդեն պետք կգա Չեռնոգորիայի հետ խաղում»,- Սենթ Քիթս եւ Նեւիսի հավաքականի հետ խաղից հետո լրագրողների հետ զրույցում ասաց Հենրիխ Մխիթարյանը:
Հայաստանի հավաքականի ավագը համեստ է տոնում հաղթանակը՝ դրան այնքան էլ մեծ նշանակություն չտալով: Մխիթարյանն ավելի կարեւորում է 2018 թվականի աշխարհի առաջնության ընտրական փուլում Չեռնոգորիայի հետ որոշիչ խաղից առաջ թիմի խաղային պրակտիկան, սխալների վերլուծումը եւ շտկումը.
«Չէի ասի, թե մրցակիցը բարձրակարգ էր: Մենք փորձեցինք շատ արագ խաղալ եւ եզրափակել գրոհները շատ արագ:
Այս հաղթանակը մեզ ոչինչ չի տա: Պետք է վերլուծենք, հասկանանք մեր սխալները եւ անենք ամեն ինչ, որ Չեռնոգորիայի հետ խաղին հնարավորինս պատրաստ լինենք: Մեկնելու ենք հաղթելու համար: Իհարկե, հեշտ խաղ չի լինելու, բայց դեռ ժամանակ ունենք»,- ասաց Մխիթարյանը:
Հենրիխը խոսեց նաեւ ՈւԵՖԱ-ի Սուպերգավաթի «Մանչեսթեր Յունայթեդ»-Մադրիդի «Ռեալ» խաղի մասին.
«Շատ հաճելի է խաղալ նման խաղեր Սուպերգավաթում: Գիտենք, որ «Ռեալը» շատ լավ թիմ է: Բայց կարծում եմ մեր թիմում ֆուտբոլիստների փոփոխություն կլինի, շատերը կգնան, մյուսները կգան: Այնպես որ, դեռ ժամանակ ունենք վերլուծելու եւ պատրաստվելու»:
Անի ԳԱԼՍՏՅԱՆ
