Իսկական սթեյքի սիրահարների համար արգենտինյան սթեյքը` յուրահատուկ թանձրուկով, հրաշալի նվեր կլինի:
Միայն հիշեք, որ լավագույն սթեյքը ստացվում է լավագույն մսից, այն է` թարմ, ոչ ջլոտ (մեջքի հատվածի), որոշակի յուղայնությամբ տավարի մսից: Սթեյքի համար միսը պետք է կտրվի 2,5-4 սմ հաստությամբ: Ոչ մի դեպքում` թակել, ծեծել եւ այլն, չի կարելի: Ավելին` շատ դեպքերում խորհուրդ չի տրվում անգամ նախապես մարինացնել, աղ անել, քանի որ համարվում է, որ աղը կոշտացնում է միսը: Սակայն կա նաեւ հակառակ տեսակետը, որ կարելի է մի քանի ժամից մինչեւ 2-3 օր սթեյքը մարինացնել աղի, պղպեղի, անգամ` քացախի, կիտրոնի հյութի, հանքային ջրի եւ այլնի մեջ:
Արգենտինյան սթեյքի ողջ հմայքը չիմիչուրի թանձրուկի մեջ է: Այստեղ էլ են, ի դեպ, կարծիքները կիսվում: Դասական տարբերակով չիմիչուրիի մեջ սթեյքը թաթախվում է պատրաստ լինելուն պես, սակայն կան նաեւ չիմիչուրիի մեջ նախապես մի քանի ժամով սթեյքը մարինացնելու կողմնակիցներ: Ընտրությունը ձերն է:
Անհրաժեշտ մթերքները
Կարդացեք նաև
Տավարի միս սթեյքի համար (հայերեն ասած` չալաղաջ)- 2-3 կտոր
Աղ- ըստ ճաշակի
Սեւ, թարմ աղացած պղպեղ- ըստ ճաշակի
Չիմիչուրի թանձրուկի համար
Թարմ մաղադանոս- կես կապ
Թարմ օրեգանո (կարող եք փոխարինել անանուխով կամ ծիթրոնով)- 1-2 ճյուղ
Թարմ կծու կանաչ պղպեղ- ըստ ճաշակի
Սխտոր- 4-5 պճեղ
Աղ- 1 ճաշի գդալ
Սեւ հատիկավոր պղպեղ- մի քանի հատ
Ձիթապտղի յուղ- 3 ճաշի գդալ
Կարմիր գինու քացախ-2 ճաշի գդալ
Պատրաստման եղանակը
Նկատենք, որ սթեյք պատրաստելու համար միսը պետք է լինի սենյակային ջերմաստիճանի: Եթե սթեյքը չեք պատրաստում բաց կրակի վրա, ապա ձեզ հարկավոր է գրիլ- թավա կամ գրիլի էլեկտրական սարք:
Տավարի «չալաղաջը» կարող եք ինչպես ոսկորով պատրաստել` «սթեյք տոմոհավկ», այնպես էլ` առանց ոսկորի, այդ դեպքում այն կկոչվի «սթեյք ռիբայ»: Սենյակային ջերմաստիճանի հասած սթեյքի կտորները դրեք շատ լավ տաքացրած գրիլ-թավայի վրա: Վրան սեւ պղպեղ ցանեք: 2 րոպեից (եթե նախընտրում եք միջին եփվածության սթեյք, իսկ եթե լավ եփվածն եք սիրում, ապա` 3 րոպեից) կտորները 45 աստիճանով պտտեք, որպեսզի սթեյքի վրա գեղեցիկ վանդականախշ առաջանա: Եվս երկու րոպե անց սթեյքը շուռ տվեք: Արդեն խորովված կողմի վրա աղ արեք: 3-4 րոպե էլ այս կողմի վրա եփեք: Ստացվում է` միսը մի կողմից պղպեղով է համեմված, մյուս կողմից` աղով:
Մսի պատրաստվածության աստիճանը կախված է ինչպես մսի կտորի հաստությունից, կրակի ջերմաստիճանից, այնպես էլ` ձեր նախասիրությունից, թե ինչպիսի սթեյք եք նախընտրում` արյունոտ, միջին եփվածության, թե` լրիվ եփված: Այնպես որ` ինքներդ որոշեք ընդհանուր առմամբ սթեյքը եփել 4,6, թե անգամ 10-12 րոպե:
Մինչեւ սթեյքը խորովվի` հարկավոր է պատրաստել չիմիչուրի թանձրուկը` մանր կտրատել կանաչիները, պղպեղն ու սխտորը, դրանց վրա ավելացնել համեմունքները, քացախն ու ձեթը, լավ խառնել: Կրակից վերցնելուց անմիջապես հետո սթեյքը ընկղմեք թանձրուկի մեջ: Թողեք չիմիչուրիի մեջ մնա 7-10 րոպե, որից հետո նոր կարող եք մատուցել: Կրակից վերցնելուց անմիջապես հետո չի կարելի կտրել սթեյքը:
Կարող եք մատուցել գրիլ արված բանջարեղենի հետ: Դրա համար պարզապես լավ լվացեք եւ բարակ-բարակ կտրատեք դդմիկը, սունկը, թարմ պղպեղները, սոխը: Դրեք շատ տաք գրիլ-թավայի վրա, 1-2 րոպե թողեք յուրաքանչյուր կողմի վրա: Չերրի լոլիկները ամբողջական վիճակում 1-2 րոպեով դրեք թավայի վրա եւ արագ հանեք, որպեսզի հյութը չհոսի: Բանջարեղենը նույնպես համեմեք պատրաստ լինելուց հետո` աղ, թարմ աղացած պղպեղ, բուսական յուղ:
Վստահեցնում եմ` այսպիսի ընթրիքը ձեր տնեցիները կամ հյուրերը երկար կհիշեն:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
