Գյումրի բժշկական կենտրոնից ստացված տեղեկությունների համաձայն, այսօր, ժամը 14․30-ին տարբեր մարմնական վնասվածքներով իրենց մոտ է տեղափոխվել Ախուրյանի շաքարի գործարանի աշխատակից, 1986 թվականին ծնված Ախուրյանի բնակիչ Շ․Ղ-ն, որն ընկել է բարձրությունից։
Ինչպես Aravot.am-ին փոխանցեց հիվանդանոցի փոխտնօրեն Արմեն Խաչատրյանը, վերջինս վիրաբուժական բաժանմունք է ընդունվել կրծքավանդակի փակ վնասվածքով, կրծքավանդակի ձախ կեսի փափուկ հյուսվածքների սալջարդով, գոտկային հատվածի փափուկ հյուսվածքների սալջարդով, բազմաթիվ քերծվածքներով։ Նա գտնվում է ստացիոնար բուժման և հետազոտման մեջ։
Շիրակի մարզի դատախազ Կարեն Գաբրելյանը Aravot.am-ն տեղեկացրեց, որ մահացել է մահացել է 1974 թվականին ծնված տղամարդ, նյութեր են նախապատրաստում դեպքի հանգամանքները ճշտվում են։
ՀՀ ոստիկանության լրատվության և հասարակայնության հետ կապերի վարչությունից Aravot.am-ին տեղեկացրեցին, որ ժամը 13․45-ին ոստիկանությունն ահազանգ է ստացել Ախուրյանի շտապօգնության կայանից այն մասին, որ երկու տղամարդ բարձունքից վայր են ընկել։
Դեպքի վայր մեկնած օպերատիվ խումբը պարզել է, որ 13․15-ի սահմաններում շաքարի գործարանի տարածքում երկու հոգի՝ 1986 թվականին ծնված Շ․Ղ-ն ու 1974 ծնված Ա․Թ․-ն, գտնվելով բեռնատար գնացքի վագոնի վրա, շարժվել են անգարի ուղղությամբ, բախվել են անգարին, ընկել ներքև։ Տղամարդկանցից Ա․Թ-ն տեղում մահացել է, իսկ Շ․Ղ․-ն՝ մարմնական վնասվածքներով, տեղափոխվել հիվանդանոց։
Նունե ԱՐԵՎՇԱՏՅԱՆ
