Վանաձորի ներհամայնքային ճանապարհները շարունակում են անհարմարություններ պատճառել վարորդներին: Նրանք դժգոհում են, որ անբարեկարգ փողոցների պատճառով մեքենաները վնասվում են, իսկ աշխատած գումարը ծախսում են միայն մեքենաները վերանորոգելու համար: Քաղաքում փոսալցում իրականացնելու նպատակով յուրաքանչյուր տարի բյուջեից հատկացվում է որոշակի գումար: Այս տարի այդ աշխատանքները կատարելու համար նախատեսված է 100 մլն. դրամ:
Թեեւ մրցույթը շահած կազմակերպության հետ պայմանագիրը կնքված է մայիսի 11-ից, սակայն մինչ օրս կատարված աշխատանքներն այդքան էլ տեսանելի չեն: Վանաձորի քաղաքապետ Մամիկոն Ասլանյանն ասում է, որ աշխատանքները ձգձգվելու հիմնական պատճառը եղանակային անբարենպաստ պայմաններն են. «Նախորդ օրը ես ճանապարհաշինարարների հետ էի զրուցում, կոշտ խոսակցություն եղավ: Բայց իրենք էլ բացատրում էին, որ եղանակային պայմանները լավը չեն եղել: Մայիս ամսին ընդամենը 5 օր է արեւ եղել: Եղանակային անբարենպաստ պայմանների դեպքում սխալ է փոսալցում անելը: Ես էլ եմ վարորդ, ինձ էլ չի հաճելի այդ վիճակը, բայց եղանակը թույլ չի տալիս: Հիմա արագ տեմպերով անում են, ինչքան հնարավոր է, որ եղանակի հետ հարմարեցնենք: Դա էլ խոսակցությունների թեմա չդառնա, որ անձրեւի ժամանակ ասֆալտապատում է իրականացվում»:
Մայիսի 31-ին մարզկենտրոնը սպասարկող մի քանի երթուղիների 20-ից ավելի վարորդներ դադարեցրել էին իրենց աշխատանքն ու գործադուլ էին անում։ Նրանք պահանջում էին, որպեսզի քաղաքի ճանապարհները բերվեն պատշաճ տեսքի:
Քաղաքապետարանում վարորդներին վստահեցրել էին, որ մի քանի օրվա ընթացքում կիրականացվեն փոսալցումներ. «Փոսերի կտրտման աշխատանքները, որ կատարել էին, ավելի շատ դա է տրանսպորտային միջոցներին նեղություն տալիս: Որովհետեւ, եթե փոսը մշակված է, ինքը սուր ծայր ունի եւ անվահեծերի համար շատ բարդ է երթեւեկելը: Դա էր հիմնական դժգոհության պատճառը եղել: Մի քանի օրվա մեջ կտրտած մասերը կվերանորոգվի, որից հետո կանցնենք գրաֆիկով աշխատանքին»,- ասում է Մամիկոն Ասլանյանը:
Կառավարության պահուստային ֆոնդից ճանապարհները նորոգելու համար այս տարի Վանաձորին կհատկացվի 300 մլն. դրամ. «Քաղաքի ավտոճանապարհների համար լրացուցիչ գումար է տրվելու: Գումարն էլ, երբ որ ռեալ կլինի, արդեն կորոշվենք, թե հիմնանորոգում կանենք, թե փոսային լցում: Հիմնանորոգման համար սա շատ քիչ գումար է: Եթե ամբողջությամբ ճանապարհը կապիտալ նորոգվի, ապա ամեն կիլոմետրը մոտավորապես կկազմի՝ 300-400 մլն. դրամ»,- ասաց քաղաքապետը:
220 կմ երկարություն ունեցող Վանաձորի ճանապարհները տարիներ շարունակ վերանորոգվել են հիմնականում փոսային նորոգումների միջոցով: Վերջին անգամ քաղաքում հիմնանորոգման աշխատանքներ են կատարվել են մի քանի տարի առաջ: Հիմնանորոգել են՝ Տիգրան Մեծ պողոտան եւ Թումանյան փողոցի մի հատվածը:
«Վերջին 20-30 տարում, բայցի այդ փողոցները, քաղաքի հիմական փողոցներից որեւէ մեկը չի հիմնանորոգվել: Շինարարական տեսակետից դա հավելյալ դժվարություն է առաջացնում՝ լցրած փոսերը չեն դիմանում, որովհետեւ հիմքերն արդեն խարխլված են»,-ասում է Մամիկոն Ասլանյանը:
Իսկ մինչ այդ, նախատեսվում է, որ այժմ իրականացվող փոսային նորոգման աշխատանքները կավարտվեն մինչեւ այս տարվա օգոստոսի 31-ը:
Տաթեւիկ ՂԱԶԱՐՅԱՆ
