Բերդի տարածաշրջանի համայնքներից մեկի ղեկավարը, որը ոստիկանություն է դիմել իջեւանցի կնոջ կողմից իրենից խաբեությամբ 200 հազար դոլար վերցնելու համար, մեզ զանգահարելով՝ասաց, որ այդ կինը նախկինում աշխատել է բարեգործական մի կազմակերպությունում, որն իրենց գյուղում 2013թ. բուժկետ է կառուցել եւ կահավորել: Գյուղապետն ասաց, որ այդ կինը համոզելու մեծ շնորհք ունի, դիմացինի վրա ազդելու համար կարողանում է հիպնոսացնել:
Համայնքի ղեկավարն ասաց, որ ինքը 200 հազար դոլարը հավաքել է իր հարազատներից, համագյուղացիներից, 6 ամսվա ընթացքում 3 անգամ, ստացականներով տվել է այդ կնոջը՝ իբր գյուղում իրականացվելիք զարգացման ծրագրերում որպես համայնքի ներդրում:
«Մինչեւ վերջ ինձ թալանեց այդ անխիղճը»,- իջեւանցի կնոջից գանգատվեց համայնքի ղեկավարը:
Մեր տեղեկություններով ՝ նշված կինը խաբեությամբ գումարներ է վերցրել Իջեւան քաղաքի մի բնակչուհուց, Իջեւանի տարածաշրջանի սահմանամերձ գյուղերի մեկի բժշկուհուց, Դիլիջան քաղաքի բնակչից, Ճամբարակի տարածաշրջանի գյուղերից մեկի բժշկուհուց: Իջեւանցի 36-ամյա կինն այժմ Իջեւանում գտնվող իր առանձնատան «եվրոռեմոնտ է» կատարում:
Հիշյալ կնոջ կողմից Բերդի տարածաշրջանի համայնքներից մեկի ղեկավարից 200 հազար դոլար վերցնելու գործով քրեական գործ է հարուցվել ՀՀ քրեական օրենսգրքի 178 հոդվածի 2-րդ մասով («Խարդախությունը՝ խաբեության կամ վստահությունը չարաշահելու եղանակով ուրիշի գույքի զգալի չափերով հափշտակությունը կամ ուրիշի գույքի նկատմամբ իրավունք ձեռք բերելը»):
Սույն քրեական հոդվածով բնութագրվող գործողությունները պատժվում են 500 հազարից 1 միլիոն դրամ տուգանքով կամ 2-5 տարի ազատազրկմամբ: Քննությունը կպարզի, թե 200 հազար դոլարն ամբողջությա՞մբ, թե՞ դրա մի մասն է տրվել իջեւանցի կնոջը: Քրեական գործը քննվում է ՀՀ քննչական կոմիտեի Տավուշի մարզային քննչական վարչությունում: Այդ վարչությունից տեղեկացանք, որ քրեական գործը հարուցվել է ոչ թե իջեւանցի կնոջ, այլ՝ փաստի վերաբերյալ; Ուստի այդ կնոջ նկատմամբ խափանման միջոց ընտրված չէ: Քրեական գործով նախաքննությունը շարունակվում է:
Ոսկան ՍԱՐԳՍՅԱՆ
