Վանաձոր քաղաքում գրանցված է շուրջ 180 վերելակ: Դրանցից բնակարանային տնտեսությունները սպասարկում են 106-ը: Այս տարվա ընթացքում փորձաքննության են ենթարկվել ու դրական եզրակացություն ստացել 40 վերելակներ:
Բազմաբնակարան շենքերի վերելակների փորձաքննություն իրականացնելու համար համատիրությունները պետք է դիմեն Լոռու եւ Տավուշի մարզերի տեխնիկական անվտանգության փորձաքննության բաժին, կնքեն պայմանագիր, որից հետո տարեկան առնվազն մեկ անգամ կանցկացվի վերելակների փորձաքննություն: Մեկ վերելակի փորձաքննության արժեքը կազմում է 2.930 դրամ:
«Այն վերելակները, որոնք որ մեր կողմից փորձաքննության են ենթարկվում եւ եթե թեկուզ չնչին սպառնալիք է լինում վթարի, կամ վերելակը ոչ աշխատունակ է լինում, ուրեմն տրվում է բացասական եզրակացություն: Եվ վերելակը շահագործման ենթակա չէ, մինչեւ թերությունները չվերացվեն: Անհնար է, որ մենք չաշխատող, խափանված վերելակին տանք դրական եզրակացություն»,- ասաց Լոռու և Տավուշի մարզերի տեխնիկական անվտանգության փորձաքննության բաժնի պետ Կարեն Բոյաջյանը:
Ընդհանրապես, վերելակների շահագործման երաշխիքային ժամկետը 20-25 տարի է: Սակայն այսօր շահագործվող վերելակները գրեթե 40 տարեկան են:
Aravot.am-ի հետ զրույցում Կարեն Բոյաջյանն անդրադարձավ նաեւ մայիսի 30-ին Աղայան 74/1 հասցեում գրանցված դեպքին: 14-ամյա աղջիկը ընկել էր վերելակի հորանը:
Նշված հասցեի վերելակը վերջին անգամ փորձաքննություն է անցել 2016 թվականի դեկտեմբերին: Տեխնիկական անվտանգության փորձաքննության բաժնի պետի խոսքով՝ փորձաքննության ժամանակ վերելակը եղել է սարքին վիճակում:
«Փորձագետների եզրակացության հիման վրա է պարզ դառնում՝ պիտանի՞ են արդյոք այդ վերելակները շահագործման, թե՞ ոչ: Այդ վերելակը փորձաքննության ժամանակ տեխնիկապես սարքին վիճակում է եղել, իրենից ոչ մի սպառնալիք չի ներկայացրել»:
Շենքը սպասարկող «Նարեկ» համատիրության նախագահ Ռուզաննա Օհանյանն էլ վստահեցրեց, որ վերելակի հետ կապված խնդիրներ երբեւէ չեն եղել. «Ոչ մի անգամ վերելակի հետ կապված խնդիր չի առաջացել: Սպասարկումը շատ լավ կատարվել է: Այդ օրն էլ բնակիչները մինչեւ 6:30 օգտվել են վերելակից: Կարող է պատահականություն է եղել, կամ այդ պահին է թերություն առաջացել: Կարող է երեխաներն են սխալ գործողություն կատարել: Այս պահին վերելակը կանգնած է, չի գործում, ստուգումներ են իրականացնում»:
Նշված դեպքից հետո Լոռու մարզպետարանում հրավիրվել է խորհրդակցություն: Մարզպետ Արթուր Նալբանդյանի կողմից, մարզի քաղաքային համայնքների ղեկավարներին հանձնարարվել է հետևողական լինել վերելակների շահագործման տեխհսկողությանը: Մարզի ղեկավարի պահանջով այսուհետ շահագործվող վերելակները կանցնեն կրկնակի տեխհսկողություն:
Այժմ Վանաձորում գրանցված 180 վերելակներից 59-ը չեն շահագործվում:
Տաթեւիկ ՂԱԶԱՐՅԱՆ
