Համաշխարհային առաջնորդները և քաղաքական գործիչները դատապարտել են Կլիմայի վերաբերյալ փարիզյան համաձայնագրից դուրս գալու ԱՄՆ նախագահ Դոնալդ Թրամփի որոշումը:
Մասնավորապես ԱՄՆ նախկին պետքարտուղար Հիլարի Քլինթոնը Twitter-ի իր էջում դա անվանել է պատմական սխալ:
«Պատմական սխալ: Աշխարհը միասին առաջ է շարժվում կլիմայի փոփոխության հարցում: Փարիզյան համաձայնագրից դուրս գալու որոշումը ամերիկացի աշխատողներին և ընտանիքներին թողնում է ետևում»,- գրել է նա:
Ֆրանսիայի նախագահ Էմանուել Մակրոնը նույնպես սխալ է համարել Թրամփի այդ որոշումը:
«Ես հարգում եմ ԱՄՆ-ը Կլիմայի վերաբերյալ փարիզյան համաձայնագրից դուրս բերելու որոշումը, բայց ցավում եմ դրա համար: Ես կարծում եմ, որ նա (Թրամփը-խմբ.) սխալ է գործում իր երկրի ապագայի և նրա մարդկանց, ինչպես նաև ապագա մոլորակի հանդեպ»,- գրել է նա Twitter-ում:
Մակրոնը նաև հիշեցրել է, որ համաձայնագիրը ստորագրել է 195 երկիր:
Թրամփի որոշման կապակցությամբ համատեղ հայտարարությամբ հանդես են եկել Ֆրանսիայի, Գերմանիայի և Իտալիայի առաջնորդները:
«Մենք անդառնալի ենք համարում այն խթանը, որ գործի էր դրվել Փարիզում 2015թ. դեկտեմբերին, և վստահ ենք, որ Փարիզյան համաձայնագիրը չի կարող վերանայվել, քանի որ կենսական կարևոր է մոլորակի, հասարակության և տնտեսության համար»,- ասվում է նրանց համատեղ հայտարարության մեջ:
Դրանում նաև նշվում է, որ Ֆրանսիան, Գերմանիան և Իտալիան կշարունակեն իրականացնել Կլիմայի վերաբերյալ փարիզյան համաձայնագիրը: Նրանք կոչ են արել պետություններին ուժեղացնել իրենց գործողությունները՝ ուղղված կլիմայի փոփոխության դեմ պայքարին:
Եվրահանձնաժողովի նախագահ Անտոնիո Տայանին հայտարարել է, որ Փարիզի համաձայնագիրը «կենդանի է», և ԵՄ-ը կիրականացնի այն ԱՄՆ վարչակազմի մասնակցությամբ կամ առանց նրա:
Բրիտանական Independent թերթը գրում է, որ Վատիկանը հայտարարել է՝ Թրամփի արարքը «ապտակ» էր Հռոմի պապի դեմքին և իսկական աղետ բոլորի համար:
Հիշեցենք, ԱՄՆ նախագահ Դոնալդ Թրամփը երեկ հայտարարել է, որ իր երկիրը դուրս է գալիս Կլիմայի վերաբերյալ փարիզյան համաձայնագրից:
«Մենք դուրս ենք գալիս»,- Սպիտակ տան Վարդերի այգում կազմակերպված միջոցառմանը ասել էր Թրամփը՝ դատապարտելով «հրեշավոր» ֆինանսական և տնտեսական բեռը, որ դրվում է երկրի վրա այդ համաձայնագրով:
«Ամերիկան և նրա քաղաքացիներին պաշտպանելու իմ հանդիսավոր պարտավորությունը պահելու համար Միացյալ Նահանգները դուրս են գալիս Կլիմայի վերաբերյալ փարիզյան համաձայնագրից»,- ասել էր Թրամփը:
Նրա խոսքով՝ այդ համաձայնագրի պայմանների կատարումը ԱՄՆ-ին կարող է արժենալ մինչև 2025թ. 2.7 մլն աշխատատեղերի կորուստ:
Թրամփը հավելել էր, որ ԱՄՆ-ը բանակցություններ կսկսի կամ ևս մեկ անգամ Փարիզյան համաձայնագրին միանալու, կամ կնքելու «նոր գործարք այնպիսի պայմաններով, որոնք արդարացի կլինեն ԱՄՆ-ի, նրա ձեռնարկությունների, նրա աշխատակիցների, նրա մարդկանց և նրա հարկատուների համար»:
Պատրաստեց՝ Վիկտորյա ԱՆԴՐԵԱՍՅԱՆԸ
