Նախորդ գիշեր հակառակորդը գնդակոծություն է իրականացրել Տավուշի մարզի սահմանամերձ Բաղանիսի ուղղությամբ: Բարեբախտաբար զոհեր և վիրավորներ չկան, սակայն օդում կախված մեծ լարվածությունը հոռետեսության, չարագուշակ կանխատեսումների առիթ է տալիս: Պատերազմի ուրվականն է շրջում` թակելով ավելի շատ դռներ, լարվածություն առաջացնելով հայ-ադրբեջանական շփման տարբեր հատվածներում: Պատերազմի վտանգի մասին խոսում են ոչ միայն հակամարտող երկրներում, այլ նաև` միջազգային փորձագիտական կենտրոններում:
Միջազգային «Ճգնաժամային խումբ» (ICG) հետազոտական կազմակերպությունը զեկույց է հրապարակել ղարաբաղյան հակամարտության վերաբերյալ՝ իրական համարելով Ղարաբաղում լայնամասշտաբ հակամարտության վերսկսումը: «Լեռնային Ղարաբաղում կուտակվող պատերազմական ամպերը» վերնագրով զեկույցում նշված է, որ 2016 թվականի ապրիլյան էսկալացիայից հետո Հայաստանն ու Ադրբեջանն ավելի քան երբևէ մոտ են պատերազմին:
2016 թվականի ապրիլի էսկալացիայի պատճառ հանդիսացած քաղաքական ու անվտանգային պայմաններն ավելի ցայտուն են դարձել: Զեկույցում նշված է, որ 2017 թվականի հունվարից ծանր հրետանու և հակատանկային զինատեսակների կիրառմամբ մահացու միջադեպերը հաճախակիացել են: ՃԽ հետազոտողները նշում են, որ բանակցային գործընթացն արգելակվել է, և ուժի կիրառումն ավելի գայթակղիչ է դարձել առնվազն մարտավարական նպատակներով: Այսօր երկու կողմն էլ կարծես թե պատրաստ են առճակատմանը: Լարվածությունը, ըստ ՃԽ-ի, կարող է լայնամասշտաբ հակամարտության վերածվել և ստիպել տարածաշրջանային գլխավոր խաղացողներին միջամտել:
Սարգիս Արծրունի
Հոդվածն ամբողջությամբ կարող եք կարդալ «Ժամանակ» թերթի այսօրվա համարում
