Դդմիկը համարվում է շատ արժեքավոր բանջարեղեն, ունի նուրբ կեղեւ, որը մաքրելու կարիք չկա: Միջուկը պարունակում է այնպիսի հանքային նյութեր ու վիտամիններ, ինչպիսիք են ֆոսֆորը, երկաթը, B1, B2, B9, PP, A, C եւ այլն: Այս բանջարեղենն օրգանիզմի համար նպաստավոր է հատկապես կալիումի ու նատրիումի հարաբերակցության տեսակետից: Դդմիկը կարելի է օգտագործել եւ եփած, ջուրը շատ քիչ պետք է լցնել, եւ հում վիճակում: Աղցան պատրաստելիս բարակ-բարակ կտրտեք եւ ավելացրեք լոլիկ, վարունգ, առատ կանաչի, համեմունքներ:
Դդմիկը հագեցած է աղեստամոքսային համակարգի աշխատանքը խթանող, փորկապությունն անցկացնող եւ նյութափոխանակությունն արագացնող բջջանյութով: Այնպես որ, մասնագետները նիհարել ցանկացողներին խորհուրդ են տալիս անպայման այս մթերքը ներառել սննդակարգում: Ավելորդ քաշի եւ ճարպակալության դեպքում դդմիկով նախուտեստներն արագորեն հագեցնում են մարդուն: Այս բանջարեղենը օրգանիզմից արագորեն հեռացնում է ավելորդ հեղուկը եւ ազատում է այնպիսի տհաճ երեւույթից, որը կոչվում է ցելյուլիտ:
Հում դդմիկը հակացուցված է բարձր թթվայնությամբ գաստրիտի եւ ստամոքսի խոցի դեպքում:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ»
01.06.2017
