«Այնպես չի, որ հիմա հեծանիվն այդպես հասանելի է, թող պատգամավորներն իրենց նեղ շրջապատով չդատեն». Փաշինյան

Դուք ինչպիսի՞ երեխա եք եղել, երեւում է, որ չար եք եղել: Մեր այս հարցին այսօր ԱԺ-ում «Ելք» խմբակցության ղեկավար Նիկոլ Փաշինյանը պատասխանեց. «Չեմ հիշում, չեմ կարծում, թե չար եմ եղել: Չնայած ընտանիքի փոքրն եմ եղել, երեւի մի քիչ երես տված կլինեն»:

Մենք հետաքրքրվեցինք, թե մանկության ինչ հիշողություններ ունի պարոն Փաշինյանը, ՀՀԿ խմբակցության ղեկավար Վահրամ Բաղդասարյանը ժամանակին պատմում էր, որ փոքր ժամանակ երազել են հեծանիվ ունենալ, այն այդքան անհասանելի է եղել իրենց համար: Նիկոլ Փաշինյանն արձագանքեց. «Այնպես չի, որ հիմա հեծանիվն այդպես հասանելի է, թող պատգամավորներն իրենց նեղ շրջապատով չդատեն»:

Նիկոլ Փաշինյանն ասաց, որ մանկությունն անցել է Իջեւանում. «Հիշում եմ, որ շատ դժվարությամբ էի մանկապարտեզ գնում, չէի գնում եւ ի վերջո չգնացի: Հիշում եմ, որ դպրոց ենք գնացել, սովորել, ոչ մի առանձնահատուկ բան»:

Այս տարի առաջին եռամսյակում արդեն 5 հազար մարդ արտագաղթել է, այդ թվում՝ երեխաներ: Հարցին՝ սրանում իշխանությունների մեղքը կա՞՝ նա պատասխանեց. «Ցանկացած նման իրավիճակի համար առաջին մեծագույն մեղքը իշխանությանն է»:

Անցյալ տարի հունիսի 1-ին ԱԺ նախկին նախագահ Գալուստ Սահակյանը, շնորհավորելով Երեխաների պաշտպանության օրը, ասաց, որ «երեխաները պարտավոր են մեծանալ»:

Մեր հարցին՝ իսկ իշխանությունները ի՞նչ են պարտավոր անել՝ Նիկոլ Փաշինյանը պատասխանեց. «Իշխանություններն էլ են պարտավոր մեծանալ»:

Հռիփսիմե ՋԵԲԵՋՅԱՆ