«Այդ կերպ Թուրքիայի նախագահ Ռեջեփ Թայիփ Էրդողանը փորձում է տրորել «Ժողովրդահանրապետական»՝ աշխարհիկ քեմալիստական գաղափարախոսության կրող կուսակցությանը, ինչպես նաեւ՝ քրդամետ «Ժողովուրդների դեմոկրատական կուսակցությանը», որի պատգամավոր է մեր հայրենակից Կարո Փայլանը»,-Aravot.am-ի հետ զրույցում անդրադառնալով Թուրքիայի քրդամետ «Ժողովուրդների դեմոկրատական կուսակցության» հայազգի պատգամավոր Կարո Փայլանին անձեռնմխելիությունից զրկելու Թուրքիայի արդարադատության նախարարության՝ վերջերս ներկայացրած պահանջին, ասաց տարածաշրջանային հարցերով փորձագետ Սարգիս Հացպանյանը:
Հիշեցնենք, որ դատական մարմնի պահանջն ուղղված է նաեւ Փայլանի մի շարք այլ կուսակիցների եւ «Ժողովրդահանրապետական» կուսակցության որոշ պատգամավորների դեմ:
«Փայլանի առնչությամբ պետք է նշել, որ պատգամավորական անձեռնմխելիությունից զրկելու պատճառ չկա իրականում, դա անհեթեթ է…կարծում եմ՝ հայկական հարցի առումով նա Թուրքիայում սուր արտահայտվողի կեցվածք է դրսեւորում եւ այդ կերպ «ծակում» թուրք-ազգայնականների աչքը»,-նկատեց մեր զրուցակիցը:
Սարգիս Հացպանյանը կարծում է, որ նշյալ պատգամավորներին անձեռնմխելիությունից զրկելու եւ ձերբակալելու գործընթացը կլինի աստիճանաբար. «Կընտրեն՝ ո՞ւմ եւ ինչպե՞ս»:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
