Այսօր հունիսի 1-ն է՝ Երեխաների պաշտպանության օրը եւ ՀՀ Ազգային ժողովը ամեն տարվա պես հայտարարել էր բաց դռների օր՝ մանուկների համար: ԱԺ-ի այգում երգ ու պար էր, ատրակցիոններ, մուլտհերոսներ, ծաղրածուներ, էկզոտիկ կենդանիներ:
ԱԺ նորանշանակ նախագահ Արա Բաբլոյանը միջոցառմանը եկել էր երկու թոռների հետ՝ Արայի եւ Էմմիի: Թոռներն անվանակոչվել էին պապիկի եւ տատիկի անունով: Թե ինչ են դառնալու՝ նրանք դեռ չեն որոշել:
Արա Բաբլոյանը լրագրողների հետ զրույցում հարցին, թե իր թոռնիկներին ինչ խորհուրդ է տալիս, որ լավ մարդ մեծանան, կայացած լինեն՝ նա պատասխանեց. «Լինեն ազնիվ»:
Էկզոտիկ կենդանիներից Արա Բաբլոյանին գրավեց խոսող թութակը, որն սկսեց կծոտել ԱԺ նախագահի կոստյումը եւ որեւէ բառ չասաց: Հիշեցնենք, որ ի տարբերություն Արա Բաբլոյանի, ԱԺ նախկին նախագահ Գալուստ Սահակյանը մարդամոտ սկյուռներով էր հետաքրքրվում:
ԱԺ այգում գտնվող երեխաներից մեկը մոտեցավ պարոն Բաբլոյանին եւ սեղմեց ձեռքը՝ ասելով. «Ձեր նոր պաշտոնը վայելեք»:
Քանի որ Արա Բաբլոյանը հարցազրույց էր տալիս քայլելով, օպերատորներից մեկը նկարահանելիս ընկավ այգու երեխաներից մեկի վրա: Բալիկը սկսեց լաց լինել եւ այստեղ արդեն Արա Բաբլոյանը, հարցազրույցը մոռացած՝ դարձավ մանկական բժիշկ: Նա գրկեց երեխային, հետո հորդորեց շտապ երեխային ջուր տալ խմի: Բարեբախտաբար, լուրջ վնասվածք չկար:
Քանի որ այգում բազմաթիվ երեխաներ կային, ժամանցային տարբեր խաղեր, երեխաները նաեւ կորչում էին: Հաղորդավարները ժամանակ առ ժամանակ հնչեցնում էին կորած երեխայի անունը եւ խնդրում մոտենալ բեմի մոտ:
Հռիփսիմե ՋԵԲԵՋՅԱՆ
