Կառավարությունն առայժմ առաջնորդվում է 3.2% տնտեսական աճի սցենարով:
Այս մասին կառավարության նիստից հետո լրագրողների հետ զրույցում ասաց ֆինանսների նախարար Վարդան Արամյանը: Ըստ նրա, թեեւ այս տարի տնտեսական աճի 3.2%-ն է կառավարությունը թիրախավորել, սակայն, նախարարի խոսքերով ասած՝ կառավարությունն ապագա տարիներին կանխատեսում է ավելի բարձր տնտեսական աճ ապահովել՝ 4.7-5.7%:
Այս 3.2 % տնտեսական աճը, Արամյանի ներկայացմամբ, կառավարությունն ապահովելու է ներքին տնտեսական ներուժի հաշվին:
Տնտեսական ավելի բարձր ցուցանիշ թիրախավորելու համար, նախարարն ասաց, որ պետք է հաշվի առնել արտաքին զարգացումները. «Ասում էինք՝ ռիսկերը դեպի աճի ուղղությամբ են, եւ մենք ջանքերը գործադրելու ենք, որպեսզի 3.2% աճի ցուցանիշից մի փոքր ավելի բարձր աճ ունենանք: Դեռեւս այդ դրական ռիսկերը պաշտպանվում են, որովհետեւ մենք պետք է հաշվի առնենք նաեւ համաշխարհային տնտեսության զարգացումները: Առայժմ սցենարները այնպիսին են, որ մեր առեւտրային գործընկերների մոտ մի փոքր հնարավոր է բարձր տնտեսական աճի ցուցանիշ դրսեւորվի: Օրինակ՝ Ռուսաստանում այժմ խոսում են 1.5-2% տնտեսական աճի մասին, նախկին 0.8-1% ի փոխարեն»: Եվ եթե այս ցուցանիշներն իրականանան, ապա ըստ Արամյանի, որոշակի առումով նաեւ դրական կազդի Հայաստանի տնտեսության վրա:
Նախարարն ասաց, որ այս տարվա առաջին եռամսյակում օտարերկրյա ներդրումներն աճել են շուրջ 30%-ով: Այս տարվա ապրիլ ամսին եղել է 107,5 միլիարդ դրամի հարկերի հավաքագրում. «Սա ամսական այն ծրագիրն է, որը հավաքում ենք, որպեսզի տարեկան ունենանք 1 տրիլիոն 197 միլիարդ դրամի հարկերի հավաքագրման ցուցանիշ: Նախորդ տարվա մայիսին հարկերի հավաքագրման ցուցանիշը 91 միլիարդի կարգի է եղել, այս տարվա մայիսին եղել է 92.5 միլիարդ: Ընդ որում, սա այն պարագայում, որ ավելացված արժեքի հարկի վերադարձը մայիսին մի քանի անգամ բարձր է»:
Նելլի ԲԱԲԱՅԱՆ
