Հանրապետության 32 հասցեում գտնվող գեղեցիկ զարդաքանդակներով, իսկ ներսից գեղարվեստական մեծ արժեք ունեցող որմնանկարներով պատված այս շենքը պատմամշակութային հուշարձան է: Այն կառուցվել է 1876թ.` ճարտարապետ Ֆոն դեր Նոնեի կողմից: Ժամանակին շենքում եղել է Երեւանի նահանգապետի նստավայրը, մյուս մուտքում` պարսիկ հյուպատոսի աշխատասենյակը: «Թեեւ վերջինս այդտեղ պարսկական ինտերիեր է ձեւավորել, բայց շատ ցայտուն արտահայտված է, որ հայ նկարչի գործ է: Անգամ կասկածներ կան, թե որմնանկարների հեղինակները Հովնաթանյաններն են: Ընդ որում, որմնանկարներում գերակշռում են խաչերը, իսկ զարդանախշերում մեր խաչքարերի զարդանախշերից էլեմենտներ կան»,- «Առավոտի» հետ զրույցում շեշտում է ԻԿՕՄՕՍ-ի Հայաստանի ազգային կոմիտեի նախագահ Գագիկ Գյուրջյանը:
Ի դեպ, 2014թ. Երեւանի քաղաքապետարանը, ընդառաջ գնալով ԻԿՕՄՕՍ-Հայաստան կազմակերպության դիմումին, շենքն անհատույց օգտագործման իրավունքով տրամադրել է Հուշարձանների եւ տեսարժան վայրերի պահպանության միջազգային խորհրդի Հայաստանի ազգային կոմիտեի (ԻԿՕՄՕՍ) եւ Պատմական հուշարձանների պահպանման հայկական դաշնություն հասարակական կազմակերպություններին:
Լուսանկարները` ԳՈՀԱՐ ՀԱԿՈԲՅԱՆԻ
«Առավոտ»
31.05.2017
