Մայիսի 31-ին «Հայելի» ակումբում հյուրընկալվել էին Երևանի ավագանու անդամ Անահիտ Բախշյանը և կրթության ոլորտի փորձագետ,ԵՊՀ փիլիսոփայության ֆակուլտետի դասախոս Սերոբ Խաչատրյանը: Նրանք խոսեցին դպրոցների օպտիմալացումից, խնդրի վերաբերյալ հանրային և պետական արձագանքից:
«Ուզում եմ հասարակությանը հիշեցնել, թե Կրթության որակի համապատասխանություն վարկային ծրագրով ինչքան գումար է տրամադրվել օպտիմալացման վրա` 2003-04 թթ.: Այդ ժամանակ 3159 ուսուցիչ եւ 1741 դասարան է կրճատվել, դա մոտավորապես 60 դպրոց է կազմում»,-նշեց Անահիտ Բախշյանը, շեշտելով, որ կրճատվածների 87 %-ը կանայք էին: Ընդ որում, նրա հավաստմամբ, կրճատված ուսուցիչների շրջանում փոքր բիզնեսի ծրագրերը հետաքրքրություն չառաջացրին, թեեւ վարկային ծրագիրը նման աջակցություն էր նախատեսում նրանց, 6 ամսվա աշխատավարձի միանվագ վճարում եւ այլն:
«Հիմա ուղղակի կրճատելու են, մարդկանց դուրս են գցելու: Ես չեմ տեսնում այն պահանջատիրությունը, որ ձայն հանեն: Այս ինչ աստիճանի են հանրապետականացրել մարդկանց»,- ասաց Երևանի ավագանու անդամը: Նրա ձեւակերպմամբ, տնօրենները «տազ արած նստած» են, կամ էլ ասում են՝ աշակերտներն են պակասել, դպրոցները չեն փակվում, մինչդեռ պետք է ընդվզեին:
Սերոբ Խաչատրյանն այն կարծիքին է, որ կրթության մեջ օպտիմալացումը պետք է կապվի ավելի մեծ գաղափարների հետ, այլապես դա անելն անիմաստ է: «Նախարարն առաջարկեց, որ դա օպտիմալացում չէ, այլ դպրոցների վերաբեռնավորում, որի արդյունքում թերբեռնված դպրոցներում աշակերտների թիվը կաճի»,- ասաց կրթության փորձագետը: Նաեւ հարց տվեց. «Այդ ինչպե՞ս եք որոշում, թե՞ որ երեխաները պետք է դուրս գան ու գնան կողքի դպրոց»:
Նրա կարծիքով, ծանրաբեռնված դպրոցներում, որտեղ 7-8 առաջին դասարան են ունենում, կարող են կոռուպցիոն ռիսկեր առաջ գալ:
«Հայաստանում պահի թելադրանքով, պաշտոնյայի նախընտրությամբ որոշումներ են կայացվում, մինչդեռ պետք է լինի երկարաժամկետ ռազմավարություն կրթության ոլորտում»,-կարծում է բանախոսը:
Սերոբ Խաչատրյանի կարծիքով, իրականացվելիք օպտիմալացումը ավելորդ կրթական համակարգը ցնցելու է:
Գոհար ՀԱԿՈԲՅԱՆ
