ՀՀ ԱԺ-ում քվեարկության դրվեց «Պետական պաշտոններ զբաղեցրած անձանց սոցիալական երաշխիքների մասին» ՀՀ օրենքում փոփոխություն է կատարվելու մասին և «ՀՀ քննչական կոմիտեի մասին» ՀՀ օրենքում փոփոխություն կատարելու մասին փաթեթը: Այն երկրորդ ընթերցմամբ ընդունվեց 61 կողմ, 35 դեմ ձայների հարաբերակցությամբ, բայց վերաքվեարկության արդյունքում:
Խնդիրն այն էր, որ «Ելք» խմբակցության ղեկավար Նիկոլ Փաշինյանը հայտարարեց, թե ուրիշի փոխարեն քվեարկություն է տեղի ունենում. «ՀՀԿ վերջին շարքում երկու բացակա կա, բայց մենք ունենք լրիվ քվեարկություն»: ՀՀԿ խմբակցության ղեկավար Վահրամ Բաղդասարյանը պարզաբանեց. «Այնտեղ դատարկ աթոռ ունենք, որ ընդհանրապես նստող չկա»:
Այս ընթացքում շփոթվել էր Արա Բաբլոյանը՝ թե ում ձայն տա, ում՝ ոչ, ինչպես վարվի: ՀՀ ԱԺ նախագահն այն աստիճան էր շփոթվել, որ նրան կողքից հուշում էր փոխնախագահ Արփինե Հովհաննիսյանը:
Արա Բաբլոյանը փորձեց Նիկոլ Փաշինյանին հանդարտեցնել, թե մենք կդիմենք Էթիկայի հանձնաժողովին, որ զբաղվի այս հարցով: Նիկոլ Փաշինյանը հորդորեց արձանագրել, որ ունենք յոթ հոգի նստած, բայց ունենք ութ հոգու քվեարկություն:
ՀՀ ԱԺ արտահերթ նիստի օրակարգում դրված բոլոր նախագծերն ընդունվեցին երկրորդ ընթերցմամբ: ԱԺ-ն ավարտեց արտահերթ նիստի աշխատանքները: Պարոն Բաբլոյանը հայտարարեց, թե կունենանք, արտահերթ, որի մասին կտեղեկացնենք լրացուցիչ:
Տաթև ՀԱՐՈՒԹՅՈՒՆՅԱՆ
