Բնաբույժները խորհուրդ են տալիս բույսերը ոչ միայն ջրաթուրմերի եւ եփուկների ձեւով կիրառել, այլ նաեւ` կերակրատեսակների կամ աղցանների:
Օրինակ` թելուկով եւ սինդրիկով աղցանը, որը անվանվում է «Բյուրական», ունի հետաքրքիր բուժական ազդեցություն: Շատ բարերար ազդեցություն ունի անքնության ու հոգնածության անցկացման դեպքում, ինչպես նաեւ բավական արդյունավետ միջոց է լյարդի եւ լեղապարկի, միզափամփուշտի բորբոքումների ժամանակ:
Միաժամանակ խորհուրդ է տրվում աղցանը բուժիչ նպատակով օգտագործելու դեպքում ուտելիս խմել նաեւ թելուկի եւ սինդրիկի եփելուց մնացած բուսաջուրը:
Աղցանը պատրաստելու համար անհրաժեշտ է 300 գրամ թելուկ, 200 գրամ սինդրիկ, 60 գրամ նռան հատիկներ, աղ, կարմիր եւ սեւ պղպեղ, գլուխ սոխ` 100 գրամ, գազարի տերեւ` 80 գրամ, մարվանդակ` նեխուր, թթվասեր` 120 գրամ:
Պատրաստման եղանակը: Թելուկն ու սինդրիկը եւ գազարի տերեւը խաշել առանձին-առանձին, քամել, կտրտել եւ լցնել ընդհանուր թասի մեջ: Թավայի մեջ լավ տապակել բարակ, օղակաձեւ կտրատած գլուխ սոխը, լցնել թասի մեջ, ավելացնել նռան հատիկները, աղը, պղպեղը, թարմ մարվանդակը: Մատուցելիս ավելացնել թթվասերը, լավ խառնել ու ձեւավորել:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ»
30.05.2017
