Քիչ առաջ արտակարգ դեպք է գրանցվել Վանաձոր քաղաքում: Ժամը 18:30-ի սահմաններում երեխան ընկել է Աղայան 74/1 շենքի վերելակի հորանը:
«Երեխանները սեղմել են ու վերելակ կանչել: Դուռը բացվել է, չեն տեսել, որ վերելակը չի եկել ու աղջիկը ընկել է հորանը: Մյուս երեխան էլ ձեռքն էր վնասվել: 9 հարկանի շենքի 5-րդ հարկում է դեպքը գրանցվել,-այս մասին մեզ հետ զրույցում ասաց Լոռու մարզային փրկարարական վարչության պետ Կարեն Հովհաննիսյանը:
Ստացած տարբեր աստիճանի մարմնական վնասվածքներով ժամը 18:45-ի սահմաններում աղջիկները տեղափոխվել են Վանաձորի բժշկական կենտրոն:
«Բժիշկներն ամեն ինչ անում են երեխաների համար: Նրանցից մեկի՝ Լուսինեի վիճակը ծանր է: Ստացել է 2 ազդրերի կոտրվածք: Շոկային վիճակում է: Իսկ մյուս աղջիկը՝ Վիկան վնասել էր նախաբազուկը: Երեխան ամբուլատոր բուժօգնություն է ստացել ու դուրս է գրվել»,- Aravot.am-ի հետ զրույցում ասաց բժշկական կենտրոնի տնօրեն Վարդան Աբովյանը:
Տաթեւիկ ՂԱԶԱՐՅԱՆ
