Հայաստան-Վրաստան միջպետական ավտոճանապարհի Ոսկեպար-Բաղանիս հատվածը հաճախ է գնդակոծվում ադրբեջանական զինուժի կողմից: Այդ գնդակոծությունների ժամանակ ավտոմեքենաները երթեւեկում են սահմանագոտին շրջանցող, Հարսնաքարով ձգվող ուղիով, որը դառնում է «կյանքի ճանապարհ»:
Ոսկեպար-Բաղանիս շրջանցիկ ավտոճանապարհի Բաղանիս գյուղի հատվածում հողի սողանք կա, որն ավելի է մեծանում ծանր բեռնատարների տեղաշարժից : Նախատեսվում էր, որ 2016թ. պետական բյուջեի միջոցներով շրջանցիկ ճանապարհին առկա սողանքի հետեւանքները կվերացվեն, սակայն դա չարվեց:
Տավուշի մարզպետ Հովիկ Աբովյանին գրավոր հարցրել ենք ՝ 2017 թվականին նախատեսվո՞ւմ է նորոգել Բաղանիս-Ոսկեպար շրջանցիկ, Հարսնաքարով ձգվող ավտոճանապարհը:
Ի պատասխան ստացվել է Տավուշի մարզպետարանի աշխատակազմի ղեկավարի տեղակալ Ֆելիքս Ափինյանի հետեւյալ պատասխանը. « Ոսկեպար-Բաղանիս այլընտրանքային ճանապարհը ուսումնասիրվել է եւ ճանապարհային, եւ ՀՀ պաշտպանության նախարարության ինժեներական ծառայության համապատասխան մասնագետների կողմից: Դիտարկվող հատվածներին լուծումներ տալու տարբերակները քննարկման փուլում են, այս պահի դրությամբ իրականացման վերաբերյալ տեղեկատվություն առկա չէ»:
Նշենք, որ 2016թ. սեպտեմբերի 14-ից Հայաստան-Վրաստան միջպետական ավտոճանապարհի Վանաձոր-Ալավերդի հատվածը վերանորոգման նպատակով փակ է, Բագրատաշենի մաքսակետով Հայաստան մտնող, հանրապետություն բեռներ ներկրող խոշոր բեռնատարները Երեւան են հասնում Նոյեմբերյանով, Բաղանիս-Ոսկեպար ճանապարհով, այդ ճանապարհի ծանրաբեռնվածությունը մի քանի անգամ աճել է:
Ոսկան ՍԱՐԳՍՅԱՆ
