Այսօր ԱԺ-ում լրագրողների հետ զրույցում «Ծառուկյան» դաշինքի պատգամավոր Իվետա Տոնոյանը վստահեցրեց, որ «Ծառուկյան» դաշինքում ամեն ինչ կարգին է, որեւէ տարաձայնություն չկա. «Որեւէ խնդիր չկա, սա քաղաքական պայմանավորվածություն է, քաղաքական գործընթաց է եւ որեւէ մոլորության մասին խոսք լինել չի կարող»:
Հայտնի է, որ Արտյոմ Ծառուկյանը մանդատը վայր է դրել եւ նույն ընտրատարածքից ընտրված հաջորդ պատգամավորը, որին հասնում է այդ մանդատը, Գեւորգ Պետրոսյանն է: Հարցին՝ Գեւորգ Պետրոսյանի վերաբերյալ մամուլում հրապարակում կա, որ նա Արման Վարդանյանի թիմից է եւ խնդիրներ կան, հիմա նա մանդատ ստանալո՞ւ է, թե՞ ոչ: Իվետա Տոնոյանը պատասխանեց. «Գեւորգ Պետրոսյանի հետ կապված որեւէ խնդիր չկա «Ծառուկյան» դաշինքում: Որքան ես տեղյակ եմ, կարծեմ նրան նախորդող թեկնածուն եւս ինքնաբացարկ է ներկայացրել: Ընդամենը 1-2 ժամ է մնացել, սպասենք»:
Հարցին՝ Խաչիկ Մանուկյանին փոխարինողը Գագիկ Ծառուկյանի ընկերոջ դուստրն է, նաեւ Ծառուկյանի օգնականը, արդյոք Ծառուկյանն ընկերոջ համար ուժի զոռո՞վ չի վերցրել մանդատը Խաչիկ Մանուկյանից՝ Իվետա Տոնոյանը պատասխանեց, որ Նորա Առուստամյանը, որը փոխարինելու է նրան, ռեյտինգային թեկնածու է եղել եւ մոտ 5000 ձայն է ստացել: Նորա Առուստամյանի՝ խորհրդարանում հայտնվելու հարցը քննարկվել է խմբակցությունում՝ ղեկավարի գլխավորությամբ: Որեւէ այլ հարթության մեջ չեմ տեղափոխում այս հարցը»:
Լրագրողները ճշտեցին՝ ճի՞շտ է, որ Նորա Առուստամյանի հայրը կես մլն դոլար է ծախսել ընտրությունների համար, դա է պատճառը, որ Գագիկ Ծառուկյանը պնդել է, որ հենց նա լինի ԱԺ-ում՝ Իվետա Տոնոյանը պատասխանեց. «Ես նման մանրամասների չեմ տիրապետում՝ կոնկրետ թվերի բարձրաձայնման հետ կապված: Կուսակցության եւ թեկնածուների ծախսած գումարները օրենքով սահմանված կարգով ներկայացվել է»:
Հռիփսիմե ՋԵԲԵՋՅԱՆ
