«Ծառուկյան» դաշինքի պատգամավորներ Խաչիկ Մանուկյանի, Հարություն Ղարագյոզյանի եւ Արտյոմ Ծառուկյանի մանդատները ովքեր են վերցնելու՝ այս հարցին այսօր ԱԺ-ում լրագրողների հետ զրույցում դաշինքի պատգամավոր Իվետա Տոնոյանը ի պատասխան հորդորեց սպասել, մինչեւ ժամը 3-ին ԿԸՀ-ն կհրապարակի:
Նա ասաց, որ ինքնաբացարկի դիմում է ներկայացրել նաեւ Լյովա Խաչատրյանը, որն ընդգրկված էր Խաչիկ Մանուկյանի ընտրատարածքում: «Ցուցակում նրան հաջորդում է Նորա Առուստամյանը, իսկ Հարություն Ղարագյոզյանի ընտրատարածքում նրան հաջորդում է Կարեն Առաքելյանը: Նա եւս ինքնաբացարկի դիմում է ներկայացրել: Նրան հաջորդում է Հակոբ Նազարյանը»:
Ինչ վերաբերում է Գեւորգ Պետրոսյանին, Իվետա Տոնոյանն ասաց, որ նրա մասին որեւէ տեղեկատվություն չունի՝ վերցնելու է մանդատը, թե՞ ոչ:
Լրագրողները հետաքրքրվեցին՝ Գագիկ Ծառուկյանը քարոզարշավի ընթացքում քննադատում էր կառավարության գործունեությունը, շուտով կառավարության ծրագիրն է քննարկվելու, ինչպե՞ս եք քվեարկելու այդ ծրագրին, քննադատությունը պահպանվո՞ւմ է՝ նա պատասխանեց. «Պարոն Ծառուկյանի բոլոր դիտարկումները եղել են կշռադատված, հիմնավորված, տնտեսական լուրջ հենք ունեցող, որը պարոն Ծառուկյանը ներկայացրել է: Բնականաբար, տնտեսագետների խումբ է գործել այս առումով: Որեւէ բան նախապես չեմ կարող ասել, երբ կլինի քննարկում՝ կասենք»:
Հռիփսիմե ՋԵԲԵՋՅԱՆ
