Այսօր Երեւանի ավագանու դեռեւս նախորդ կազմով վերջին նիստն էր, որի ժամանակ ավագանին որոշեց համայնքին պատկանող բնակարաններ օտարել քաղաքացիներին, հուշատախտակ տեղադրել, մի քանի հողամասերի նպատակային նշանակությունը փոփոխել:
Ավագանու որոշմամբ այսօր Սպենդիարյանի անվան օպերայի եւ բալետի ազգային ակադեմիական թատրոնի առաջատար մեներգիչ Լիպարիտ Ավետիսյանին տրամադրվեց Շինարարների փողոցի 15 շենքի 96.5 քմ մակերեսով բնակարանն՝ անհատույց սեփականության իրավունքով:
Մեկ այլ բնակարան էլ տրամադրվեց, ինչպես որոշման նախագծում է գրված՝ արցախյան պատերազմի ակտիվ մասնակից, 2-րդ խմբի հաշմանդամ Կարեն Բաղդասարյանին:
Եվս 3 քաղաքացիների բնակարաններ տրամադրվեցին, նաեւ 3 քաղաքացիների էլ տրամադրվեցին բնակելի տներ՝ հողամասերով՝ անհատույց օգտագործման սեփականության իրավունքով:
Երեւանի ավագանու այսօրվա մեկ այլ որոշմամբ էլ Նորք-Մարաշ վարչական շրջանի Սերո Խանզադյան փողոցի՝ h. 65 եւ հ. 56 տնատիրություններից մինչեւ հ. 152 եւ հ. 175/4 տնատիրություններ տանող ճանապարհահատվածը վերանվանվեց Նորքի փողոց:
Ավագանու որոշմամբ թույլատրվեց Նալբանդյան փողոց հ. 9 հասցեում փակցնել ՀՀ ԳԱԱ ակադեմիկոս, դոկտոր, պրոֆեսոր Լենդրուշ Խուրշուդյանի հիշատակը հավերժացնող հուշատախտակը։
Նելլի ԲԱԲԱՅԱՆ
