Մայիսի 25-ին մաքսային ծառայության ինտերնետային կայքի միջոցով մաքսային ծառայությանը գրավոր հարցում ենք արել, թե վերջին շրջանում Բագրատաշենի մաքսակետում կադրային ի՞նչ փոփոխություններ են կատարվել:
Նույն օրը երեկոյան էլեկտրոնային փոստի միջոցով ստացել ենք պատասխան, ուր ՀՀ մաքսային ծառայության էլեկտրոնային կառավարման համակարգը մեզ շնորհակալություն է հայտնել դիմումի համար, տեղեկացրել, որ մեր դիմումը փոխանցվել է ՊԵԿ լրատվական բաժին:
Պատասխանում նշվել է, որ պատասխանի վերաբերյալ կտեղեկանանք մեր տրամադրած էլեկտրոնային փոստի հասցեի եւ հեռախոսահամարի միջոցով: 4 օր է անցել, սակայն պատասխան չենք ստացել,ուստի հրապարակում ենք Բագրատաշենի մաքսակետում կատարված կադրային փոփոխությունների մասին մեր ունեցած տեղեկատվությունը:
Ըստ դրա՝ ադրբեջանական խնձորների Հայաստան ապօրինի ներկրման հետ կապված Բագրատաշենի մաքսակետ պետ Սողոմ Մելիքսեթյանից զատ, աշխատանքից ազատվել են նույն մաքսակետի զննման բաժնի պետը եւ մաքսակետում աշխատող, Ազգային անվտանգության ծառայության մաքսանենգության դեմ պայքարի բաժնի աշխատակիցը:
Նրանց փոխարեն նոր կադրեր են նշանակվել: Բագրատաշենի մաքսակետի նոր պետի ազգանունը Հարությունյան է:
Տեղեկություններ կան, որ Բագրատաշենի մաքսակետի հին եւ նոր աշխատողները միմյանց լավ են վերաբերել, միասին քեֆ արել:
Ոսկան ՍԱՐԳՍՅԱՆ
