Եվրամիությունը մեկ տարով՝ մինչև 2018թ. հունիսի մեկը, երկարաձգել է պատժամիջոցները Սիրիայի նկատմամբ: Այս մասին ասվում է ԵՄ խորհրդի հայտարարության մեջ:
Փաստաթղթում նշվում է, որ Եվրամիությունը պատժամիջոցների տակ հայտնված անձանց ցուցակում ավելացրել է ևս երեք նախարարի անուն:
«Սիրիայի հարցով ԵՄ ռազմավարության մեջ սահմանված է, որ Եվրամիությունը կպահպանի սահմանափակող միջոցառումները սիրիական վարչակարգի ու նրա դաշնակիցների նկատմամբ այնքան ժամանակ, քանի դեռ շարունակվում են բռնաճնշումները քաղաքացիական բնակչության նկատմամբ»,- ասվում է հայտարարության մեջ:
Ընդհանուր առմամբ ԵՄ սև ցուցակում ներառված է 240 անձ և 67 կազմակերպություն:
Սիրիայի դեմ պատժամիջոցները սահմանվել են աստիճանաբար՝ 2012թ.ից: Դրանցով արգելվում է Սիրիայից նավթի ներմուծումը, ինչպես նաև այդ երկիր վառելիքի և նավթամթերքների արտահանումը:
Պատրաստեց՝ Վիկտորյա ԱՆԴՐԵԱՍՅԱՆԸ
