Նախագահ Սերժ Սարգսյանն ԱԺ-ում իր ելույթում խոսեց Կազանյան փաստաթղթի մասին եւ մտահոգություն կա, այնպիսի տպավորություն է, որ մենք կողմ ենք Կազանյան փաստաթղթին, Ադրբեջանն է դեմ, որ մենք խնդրում ենք այն ստորագրվի, հակառակորդը չի ուզում: Այս առնչությամբ Aravot.am-ի հարցին այսօր փոխարտգործնախարար Շավարշ Քոչարյանը պատասխանեց. «Գիտեք խնդիրը որն է՝ իրականում կա մի փաստաթուղթ, որն ընդունել են 3 կողմերից 2-ը՝ որպես հիմք բանակցությունների համար: Դա մադրիդյան սկզբունքներն են: Կազանյանը նույն Մադրիդի որոշակի ձեւափոխումներն են, բայց էությունը նույնն է: Կազանյանը ենթադրում է ընդամենը, որ այն, ինչ ընդունվել էր որպես հիմք՝ բանակցությունների համար, հիմա պետք է հաստատվեին այդ սկզբունքները, որը տեղի չունեցավ»:
Մեր հարցին՝ հիմա բանակցությունների սեղանին ի՞նչ է դրված՝ Շավարշ Քոչարյանը պատասխանեց. «Հիմա բանակցությունների սեղանին դրված է կողմերի միջեւ վստահության մթնոլորտի ամրապնդումը՝ Վիեննայի, Սանկտ Պետերբուրգի պայմանավորվածությունները կյանքի կոչելով, որովհետեւ միջնորդները շատ լավ հասկանում են, որ երբ միմյանց վրա կրակում են, սադրում են, հրթիռներ են արդեն արձակում, բանակցային գործընթացում ինչ արդյունավետության մասին կարող են խոսել»:
Մենք հարցրեցին՝ լավրովյան կոչված փաստաթուղթ կա՞՝ Շավարշ Քոչարյանը պատասխանեց. «Եթե ինքը՝ Լավրովը երեք անգամ ասել է, որ չկա, դուք ինձ ո՞նցեք այդ հարցը տալիս»:
Հռիփսիմե ՋԵԲԵՋՅԱՆ
