2017 թվականի «Ավրորա» մրցանակաբաշխության դափնեկիր ճանաչվեց Սուդանի 750 հազար բնակիչ ունեցող Նուբա լեռներում մշտական ներկայություն ունեցող միակ վիրաբույժը`Թոմ Քաթինան: Մրցանակը հաղթողին հանձնեց աշխարհահռչակ շանսոնյե Շառլ Ազնավուրը:
Հիշեցնենք, որ որպես հաղթող` Քաթինային կհանձնվի նաեւ 100.000 ԱՄՆ դոլարի պարգեւ, իսկ Թոմ Քաթինան շարունակելու է նվիրատվության շղթան եւ կուղղորդի մեկ միլիոն դոլար դրամաշնորհն այն կազմակերպություններին, որոնք ոգեշնչել են իր գործը: Մրցանակը ստանալուց հետո նա նշեց իրեն ոգեշնչած կազմակերպությունների անուններ:
«Ես շփոթված եմ, չգիտեմ` ինչ անել, շնորհակալ եմ: Ես ինձ այստեղ զգացել եմ ինչպես իմ տանը, շնորհակալ եմ այդ ջերմության համար»,- ասաց Քաթինան:
Նրա պատմելով մի քանի տարի առաջ, երբ աշխատում էր մի հիվանդանոցում, այն զինված հարձակման ենթարկվեց, ու ինքը հազիվ հասցրեց փախչել այդտեղից: Այդ ընթացքում միայն մի միտք էր գլխում պտտվում` արդյոք զինյալները չեն հասկանում, որ սա հիվանդանոց է, այստեղ հիվանդներ են. «Հետո հասկացա, որ իրենց համար միեւնույնն է…մեր խնդիրն այն է, որ որոշ մարդիկ թքած ունեն մարդկային կյանքի վրա… Շնորհակալություն եմ հայտնում Աստծուն, որ ես ու մյուս մասնակիցները հասանք այստեղ ապահով»:
Արփինե ՍԻՄՈՆՅԱՆ
